پاسداران انقلاب کا امریکی بحری جہازوں اور 3 آئل ٹینکرز کو نشانہ بنانے کا دعویٰ

ایرانی پاسداران انقلاب کی بحریہ نے دعویٰ کیا ہے کہ امریکی حملوں کے جواب میں آبنائے ہرمز میں 3 آئل ٹینکرز سمیت امریکا سے منسلک 3 دیگر بحری جہازوں کو مختلف علاقوں میں نشانہ بنایا گیا ہے۔

ایرانی پاسداران انقلاب کے مطابق امریکی فورسز نے اس سے قبل 3 ایرانی آئل ٹینکرز پر حملہ کرکے انہیں نقصان پہنچایا، جس کے ردعمل میں ایرانی فورسز نے کارروائی کی۔

پاسداران انقلاب نے آبنائے ہرمز سے گزرنے والے تمام بحری جہازوں کو خبردار کیا ہے کہ وہ غیر مجاز راستوں سے گزرنے کی کوشش نہ کریں۔ ایرانی حکام نے امریکا کی جانب سے آبنائے ہرمز کے کھلے ہونے سے متعلق بیانات پر بھی اعتماد نہ کرنے کا انتباہ دیا ہے۔

ایرانی پاسداران انقلاب کا کہنا ہے کہ خلاف ورزی کی صورت میں بحری جہازوں کو نشانہ بنایا جائے گا، تاہم ان دعوؤں کی آزاد ذرائع سے فوری طور پر تصدیق نہیں ہوسکی۔

ایرانی حکام کے مطابق آبنائے ہرمز کی مکمل بحالی اس وقت تک ممکن نہیں جب تک امریکی بحری اور اقتصادی ناکہ بندی ختم نہیں ہوتی اور خطے میں جارحانہ کارروائیاں مستقل طور پر بند نہیں کی جاتیں۔

آبنائے ہرمز دنیا کے اہم ترین بحری تجارتی راستوں میں شمار ہوتی ہے، جہاں سے عالمی سطح پر تیل کی بڑی مقدار گزرتی ہے۔ خطے میں بڑھتی ہوئی کشیدگی کے باعث آبنائے ہرمز میں بحری آمدورفت اور عالمی توانائی کی منڈیوں پر بھی اثرات مرتب ہونے کا خدشہ ہے۔