اسحاق ڈار کی ایرانی وزیر خارجہ سے ملاقات، اسلام آباد مفاہمتی یادداشت پر عملدرآمد پر زور

بشکیک: نائب وزیراعظم اور وزیر خارجہ اسحاق ڈار نے ایرانی وزیر خارجہ عباس عراقچی سے ملاقات میں دوطرفہ تعلقات، علاقائی صورتحال اور خطے میں امن و استحکام کے لیے سفارت کاری کی اہمیت پر تبادلہ خیال کیا۔

شنگھائی تعاون تنظیم (ایس سی او) کے سربراہ اجلاس سے قبل ہونے والی ملاقات میں اسحاق ڈار نے کہا کہ خطے میں امن و استحکام کے لیے مذاکرات اور سفارت کاری ناگزیر ہیں۔ انہوں نے کہا کہ اسلام آباد مفاہمتی یادداشت پر فریقین کا مخلصانہ عملدرآمد ہی آگے بڑھنے کا واحد راستہ ہے۔

دونوں وزرائے خارجہ نے مسلسل رابطے جاری رکھنے کی اہمیت پر بھی اتفاق کیا۔

جون میں طے پانے والی اسلام آباد مفاہمتی یادداشت کے تحت 28 فروری کو ایران پر امریکی اور اسرائیلی حملوں سے شروع ہونے والی جنگ کے خاتمے کے لیے ایک فریم ورک فراہم کیا گیا تھا۔ یہ مفاہمت پاکستان اور دیگر ممالک کی جانب سے کی جانے والی ثالثی کی کوششوں کا نتیجہ تھی۔

اس سے قبل اپریل میں بھی پاکستان نے امریکا اور ایران کے درمیان جنگ بندی کے لیے اہم کردار ادا کیا تھا۔ تاہم وقفے وقفے سے ہونے والے حملوں، بالخصوص آبنائے ہرمز کے اطراف جاری کارروائیوں کے باعث حتمی امن معاہدے کے امکانات متاثر ہوئے ہیں۔

ایک روز قبل وزیراعظم شہباز شریف نے بشکیک میں سربراہی کانفرنس کے موقع پر ایرانی صدر مسعود پزشکیان سے ملاقات کی تھی، جس میں اسلام آباد مفاہمتی یادداشت کے تحت طے پانے والی مفاہمت کو آگے بڑھانے کی ضرورت پر زور دیا گیا۔

اسحاق ڈار کی ازبک اور بیلاروس کے وزرائے خارجہ سے بھی ملاقاتیں

دریں اثنا ایس سی او اجلاس کے موقع پر نائب وزیراعظم اسحاق ڈار نے ازبکستان کے وزیر خارجہ بختیار سعیدوف سے بھی ملاقات کی۔

ترجمان دفتر خارجہ کے مطابق ملاقات میں پاکستان اور ازبکستان کے درمیان بڑھتی ہوئی شراکت داری کے عزم کا اعادہ کیا گیا۔ دونوں وزرائے خارجہ نے باہمی دلچسپی کے تمام شعبوں میں تعاون مزید مضبوط بنانے اور پاک ازبک تعلقات کو مزید مستحکم کرنے پر اتفاق کیا۔

علاوہ ازیں اسحاق ڈار کی بیلاروس کے وزیر خارجہ سے بھی ملاقات ہوئی، جس میں دوطرفہ تعلقات، علاقائی صورتحال اور باہمی دلچسپی کے دیگر امور پر تبادلہ خیال کیا گیا۔