اشیائے ضروریہ کی ذخیرہ اندوزی اور گرانفروشی میں ملوث عناصر کے خلاف سخت کارروائی کا حکم

اسلام آباد: نائب وزیراعظم اور وزیر خارجہ سینیٹر محمد اسحاق ڈار نے اشیائے ضروریہ کے ذخائر اور قیمتوں کا جائزہ لینے کے لیے اجلاس کی صدارت کرتے ہوئے متعلقہ حکام کو ذخیرہ اندوزی، مصنوعی قلت اور گرانفروشی میں ملوث عناصر کے خلاف سخت کارروائی کی ہدایت کی ہے۔

اجلاس کے دوران نائب وزیراعظم کو ملک میں اشیائے ضروریہ کے وافر ذخائر کی دستیابی اور قیمتوں میں استحکام کی صورت حال پر بریفنگ دی گئی۔

اس موقع پر اسحاق ڈار نے کہا کہ وزیراعظم کی ہدایات کے مطابق عوام کو سہولت فراہم کرنے کے لیے اشیائے ضروریہ کی سپلائی چین اور قیمتوں کی مسلسل نگرانی کی جائے۔

انہوں نے متعلقہ حکام کو ہدایت کی کہ مارکیٹ میں اشیائے ضروریہ کی دستیابی یقینی بنانے کے ساتھ ساتھ قیمتوں پر بھی کڑی نظر رکھی جائے اور ذخیرہ اندوزی، مصنوعی قلت پیدا کرنے اور ناجائز منافع خوری میں ملوث عناصر کے خلاف سخت اقدامات کیے جائیں۔

اجلاس میں اعلیٰ حکام کی شرکت

اجلاس میں قومی غذائی تحفظ اور ماحولیاتی تبدیلی کے وفاقی وزراء، معاون خصوصی طارق باجوہ اور سیکرٹری تجارت نے شرکت کی۔

اس کے علاوہ وفاقی اور صوبائی متعلقہ وزارتوں کے اعلیٰ حکام بھی اجلاس میں شریک ہوئے۔

اجلاس میں اشیائے ضروریہ کے ذخائر، قیمتوں میں استحکام اور عوام کو مناسب نرخوں پر بنیادی اشیا کی فراہمی یقینی بنانے کے لیے جاری اقدامات کا جائزہ لیا گیا۔