ایران نے حملہ کیا تو اسرائیل بھرپور طاقت سے جواب دے گا: اسرائیلی وزیر دفاع اسرائیل کاٹز

تل ابیب: اسرائیل کے وزیر دفاع اسرائیل کاٹز نے خبردار کیا ہے کہ اگر ایران نے اسرائیل پر حملہ کیا تو اسرائیل بھرپور طاقت کے ساتھ جوابی کارروائی کرے گا۔

اسرائیلی وزیر دفاع کے مطابق اسرائیلی فوج یہودیوں کے اہم مذہبی تہواروں کے دوران ایران کی جانب سے ممکنہ حملے کے لیے مکمل طور پر تیار ہے۔ یہ مذہبی تہوار ستمبر کے وسط میں شروع ہونے والے ہیں۔

اسرائیل کاٹز نے کہا کہ ایران اس وقت خطے میں مختلف مقامات کو نشانہ بنا رہا ہے، تاہم اسرائیل کو بھی ممکنہ ایرانی حملے کا خدشہ ہے، جس کے پیش نظر اسرائیلی فوج کو دفاعی اور جارحانہ دونوں طرح کی کارروائیوں کے لیے تیار رکھا گیا ہے۔

انہوں نے واضح کیا کہ ایران کی جانب سے اسرائیل پر حملے کی صورت میں اسرائیل کسی دوسرے ملک کی مدد یا اجازت کا انتظار نہیں کرے گا بلکہ خود فوری کارروائی کرے گا۔

اسرائیلی وزیر دفاع کا کہنا تھا کہ اسرائیلی جنگی طیارے اور دیگر دفاعی صلاحیتیں مکمل طور پر تیار ہیں اور کسی بھی ممکنہ صورتحال سے نمٹنے کے لیے فوج کو الرٹ کر دیا گیا ہے۔

اسرائیل کاٹز کے اس بیان کے بعد ایران اور اسرائیل کے درمیان پہلے سے موجود کشیدگی میں مزید اضافے کے خدشات پیدا ہوگئے ہیں۔ دونوں ممالک کے درمیان بڑھتی ہوئی بیان بازی اور ممکنہ فوجی کارروائیوں کے باعث خطے کی صورتحال پر عالمی سطح پر بھی گہری نظر رکھی جا رہی ہے۔