جاپان کا پاکستان میں ٹی بی اسکریننگ کے لیے اہم اقدام، 21 ملین ین کی گرانٹ

اسلام آباد: جاپانی حکومت نے پاکستان میں تپِ دق (ٹی بی) کی بروقت تشخیص اور اسکریننگ کی سہولیات بہتر بنانے کے لیے ڈوپسی فاؤنڈیشن کو 21 ملین ین، یعنی تقریباً ایک لاکھ 42 ہزار 500 امریکی ڈالر کی گرانٹ فراہم کرنے کا فیصلہ کیا ہے۔

گرانٹ کے معاہدے پر یکم ستمبر 2026 کو پاکستان میں جاپان کے سفیر اکامٹسو شیوچی اور ڈوپسی فاؤنڈیشن کے نمائندے نے دستخط کیے۔

منصوبے کے تحت ڈوپسی فاؤنڈیشن اسلام آباد، راولپنڈی اور ضلع چکوال میں ایک مکمل طور پر لیس موبائل ہیلتھ یونٹ تعینات کرے گی، جس کے ذریعے پسماندہ اور دور دراز علاقوں میں بنیادی طبی سہولیات فراہم کی جائیں گی۔

موبائل ہیلتھ یونٹ میں ڈیجیٹل چیسٹ ریڈیوگرافی، ٹی بی اسکریننگ، خاندانی منصوبہ بندی سے متعلق مشاورت اور دیگر بنیادی صحت کی سہولیات فراہم کی جائیں گی۔

منصوبے کے تحت ٹی بی کی تشخیص کے لیے جدید کمپیکٹ ایکسرے سسٹم اور مصنوعی ذہانت، یعنی اے آئی ٹیکنالوجی بھی استعمال کی جائے گی۔ اس اقدام کے ذریعے سالانہ تقریباً 20 ہزار افراد کو معیاری طبی اسکریننگ کی سہولت فراہم کرنے کا ہدف مقرر کیا گیا ہے۔

ڈوپسی فاؤنڈیشن کئی برسوں سے پاکستان کی پسماندہ کمیونٹیز میں بنیادی صحت کی ضروریات پوری کرنے کے لیے خدمات انجام دے رہی ہے۔

جاپانی سفیر اکامٹسو شیوچی نے اس موقع پر کہا کہ بیماری کی بروقت تشخیص انسانی جانیں بچانے اور خاندانوں کو بیماری کے خطرات سے محفوظ رکھنے میں انتہائی اہم کردار ادا کرتی ہے۔

انہوں نے کہا کہ یہ منصوبہ نہ صرف پاکستان میں صحت کی سہولیات کی بہتری میں معاون ثابت ہوگا بلکہ جاپان اور پاکستان کے درمیان دیرینہ دوستی اور تعاون کو بھی مزید مضبوط کرے گا۔