امریکی نائب صدر جے ڈی وینس کے ہاں چوتھے بچے کی پیدائش، بیٹے کا نام ایلیک نیل وینس رکھ دیا

واشنگٹن: امریکی نائب صدر جے ڈی وینس اور ان کی اہلیہ اوشا وینس کے ہاں اتوار کو چوتھے بچے کی پیدائش ہوئی ہے۔ دونوں نے اپنے نومولود بیٹے کا نام ایلیک نیل وینس (Alec Neil Vance) رکھا ہے۔

امریکی اخبار وال اسٹریٹ جرنل کے مطابق 150 سال سے زائد عرصے میں یہ پہلا موقع ہے کہ کسی موجودہ امریکی سیکنڈ لیڈی نے اپنے شوہر کے نائب صدر کے منصب پر فائز ہونے کے دوران بچے کو جنم دیا ہے۔

رپورٹ کے مطابق اس سے قبل 1870 میں اُس وقت کے امریکی نائب صدر شوائلر کولفیکس کی اہلیہ نے ان کے دورِ منصب میں بچے کو جنم دیا تھا، جس کے بعد یہ تاریخی واقعہ دوبارہ پیش آیا ہے۔

جے ڈی وینس اور اوشا وینس کی جانب سے جاری مشترکہ بیان میں نومولود بیٹے کی پیدائش پر خوشی کا اظہار کرتے ہوئے بتایا گیا کہ بچے کا نام ایلیک نیل وینس رکھا گیا ہے۔

اس سے قبل بھی اس جوڑے کے تین بچے ہیں، جن کے نام ایون، وویک اور میرا بیل ہیں۔

امریکی نائب صدر جے ڈی وینس نے کہا ہے کہ وہ باقاعدہ والدانہ رخصت لینے کا ارادہ نہیں رکھتے، تاہم اپنے سرکاری شیڈول کو اس انداز میں ترتیب دیں گے تاکہ اپنے نومولود بیٹے اور اہلِ خانہ کے ساتھ زیادہ سے زیادہ وقت گزار سکیں۔