لنکا پریمیئر لیگ: شاہین آفریدی کو دوران میچ ڈراپ کیے جانے پر تنازع، اینٹی کرپشن یونٹ سے رجوع

کولمبو: لنکا پریمیئر لیگ (ایل پی ایل) ایک بار پھر تنازعات کی زد میں آ گئی، جہاں پاکستانی فاسٹ بولر شاہین شاہ آفریدی کو دوران میچ امپیکٹ پلیئر کے طور پر شامل نہ کیے جانے کے معاملے پر اینٹی کرپشن یونٹ سے رجوع کرنا پڑا۔

ذرائع کے مطابق شاہین آفریدی کو کینڈی رائلز کی ٹیم مینجمنٹ نے کولمبو کیپس کے خلاف میچ سے قبل بتایا تھا کہ وہ امپیکٹ پلیئر کی حیثیت سے میدان میں اتریں گے۔ تاہم میچ کے دوران کوچ نے انہیں آگاہ کیا کہ تجزیہ کار (اینالسٹ) کی غلطی کے باعث ان کا نام امپیکٹ پلیئر کی فہرست میں شامل ہی نہیں کیا گیا۔

رپورٹس کے مطابق اس غیر متوقع صورتحال پر شاہین آفریدی نے واقعے سے اینٹی کرپشن یونٹ کے آفیشل کو بھی آگاہ کیا تاکہ معاملے کا باقاعدہ ریکارڈ رکھا جا سکے۔ بعد ازاں انہوں نے ناراضی کے عالم میں پاکستان واپس جانے کا بھی فیصلہ کیا۔

معاملہ میچ ریفری کے نوٹس میں آنے کے بعد کینڈی رائلز کی ٹیم مینجمنٹ اور لیگ انتظامیہ نے شاہین آفریدی سے معذرت کی اور انہیں ٹورنامنٹ جاری رکھنے پر آمادہ کر لیا۔

دوسری جانب لنکا پریمیئر لیگ کے ترجمان نے وضاحت کرتے ہوئے کہا کہ یہ واقعہ کسی بدعنوانی کے باعث نہیں بلکہ میچ ریفری کو غلط ٹیم شیٹ جمع کرائے جانے کی وجہ سے پیش آیا تھا، جس کے نتیجے میں شاہین آفریدی کا نام امپیکٹ پلیئر کی فہرست میں شامل نہ ہو سکا۔

واضح رہے کہ رواں سیزن میں پاکستان کے دیگر کھلاڑیوں، جن میں محمد نواز، صاحبزادہ فرحان، محمد وسیم جونیئر اور عاکف جاوید شامل ہیں، بھی مختلف فرنچائزز کی نمائندگی کر رہے ہیں، جبکہ پاکستانی امپائر آصف یعقوب بھی ایونٹ میں فرائض انجام دے رہے ہیں۔

یاد رہے کہ لنکا پریمیئر لیگ کا رواں ایڈیشن آغاز سے ہی مختلف تنازعات کا شکار رہا ہے۔ ٹورنامنٹ شروع ہونے سے قبل جافنا کنگز کے بھارتی مالک منجوت کارلا کو میچ فکسنگ کے الزامات کے تحت گرفتار کیا گیا تھا، جس کے بعد لیگ انتظامیہ نے فرنچائز کے حقوق واپس لے لیے تھے اور ٹورنامنٹ کے انتظامی معاملات سری لنکا کرکٹ کے سپرد کر دیے گئے تھے۔