لیفٹیننٹ جنرل عامر رضا فور اسٹار جنرل کے عہدے پر ترقی، کمانڈر نیشنل اسٹریٹجک کمانڈ مقرر

اسلام آباد: وزیراعظم شہباز شریف نے لیفٹیننٹ جنرل عامر رضا کو فور اسٹار جنرل کے عہدے پر ترقی دے کر انہیں کمانڈر نیشنل اسٹریٹجک کمانڈ مقرر کر دیا ہے۔

وزیراعظم آفس کی جانب سے جاری بیان کے مطابق جنرل عامر رضا اس سے قبل چیف آف جنرل اسٹاف (CGS) کے طور پر خدمات انجام دے رہے تھے۔ وزیراعظم شہباز شریف نے ان کی ترقی اور نئی ذمہ داری پر مبارکباد دیتے ہوئے اس اہم منصب پر کامیابی کے لیے نیک تمناؤں کا اظہار کیا۔

جنرل عامر رضا نے 1988 میں پاک فوج میں کمیشن حاصل کیا۔ وہ کمانڈ اینڈ اسٹاف کالج کوئٹہ اور نیشنل ڈیفنس یونیورسٹی اسلام آباد سے گریجویشن کر چکے ہیں، جبکہ برطانیہ کی یونیورسٹی آف ناٹنگھم سے بین الاقوامی تعلقات میں ڈگری بھی حاصل کر رکھی ہے۔

اپنے فوجی کیریئر کے دوران وہ جنوری 2025 میں چیف آف جنرل اسٹاف مقرر ہوئے۔ اس سے قبل وہ کور کمانڈر لاہور اور چیئرمین ہیوی انڈسٹریز ٹیکسلا سمیت اہم عسکری ذمہ داریاں بھی نبھا چکے ہیں۔

واضح رہے کہ پاکستان آرمی، ایئرفورس اور نیوی (ترمیمی) بل 2025 کی منظوری کے بعد کمانڈر نیشنل اسٹریٹجک کمانڈ کا نیا عہدہ متعارف کرایا گیا تھا۔ اسی قانون سازی کے تحت فیلڈ مارشل عاصم منیر کو چیف آف ڈیفنس فورسز مقرر کیا گیا۔

یہ نیا منصب چیئرمین جوائنٹ چیفس آف اسٹاف کمیٹی (CJCSC) کے عہدے کے خاتمے کے بعد تشکیل دیا گیا ہے۔ جنرل شمشاد مرزا اس منصب پر خدمات انجام دینے والے آخری افسر تھے، جس کے بعد اس عہدے کو ختم کر دیا گیا۔

ترمیم شدہ قانون کے مطابق وزیراعظم کو چیف آف آرمی اسٹاف کی سفارش پر حاضر سروس فور اسٹار جنرلز میں سے کمانڈر نیشنل اسٹریٹجک کمانڈ کی تین سالہ مدت کے لیے تقرری کا اختیار حاصل ہے، جبکہ چیف آف آرمی اسٹاف ہی چیف آف ڈیفنس فورسز کی ذمہ داریاں بھی انجام دیں گے۔