ایران جنگ جیت چکے ہیں، حملے کا فیصلہ درست تھا: ڈونلڈ ٹرمپ

امریکی صدر ڈونلڈ ٹرمپ نے ایران کے خلاف امریکی کارروائی کا دفاع کرتے ہوئے کہا ہے کہ ایران کے معاملے پر انہوں نے درست فیصلہ کیا اور امریکا یہ جنگ پہلے ہی جیت چکا ہے۔

ایک انٹرویو میں امریکی صدر نے ایران سمیت مختلف عالمی معاملات پر اظہار خیال کرتے ہوئے کہا کہ ’’ہم ایران جنگ پہلے ہی جیت چکے ہیں‘‘۔ ان کا کہنا تھا کہ ایران کے معاملے پر کیا گیا فیصلہ درست تھا۔

ٹرمپ نے یوکرین جنگ کے حوالے سے بھی اپنے مؤقف کا اظہار کرتے ہوئے کہا کہ وہ یوکرین میں جاری جنگ کا خاتمہ چاہتے ہیں۔

امریکی ہتھیاروں کے ذخائر سے متعلق رپورٹس مسترد

امریکی صدر نے ان خبروں اور آزادانہ تجزیوں کی بھی سختی سے تردید کی جن میں دعویٰ کیا گیا تھا کہ امریکی فوج کے ہتھیاروں اور گولہ بارود کے ذخائر کم ہو رہے ہیں۔

ڈونلڈ ٹرمپ نے ایسی رپورٹس کو غداری قرار دیتے ہوئے کہا کہ یہ خبریں ’’سو فیصد غلط‘‘ ہیں۔ ان کے مطابق امریکی فوج کے پاس گولہ بارود کی تقریباً لامحدود مقدار موجود ہے اور امریکا ہتھیاروں کی پیداوار میں بھی تیزی لا رہا ہے۔

ٹرمپ نے اپنے سوشل میڈیا پلیٹ فارم ٹروتھ سوشل پر بھی اس مؤقف کو دہرایا اور امریکی فوج کی دفاعی صلاحیت پر اعتماد کا اظہار کیا۔

مصنوعی ذہانت کے حوالے سے بھی ٹرمپ کا اظہار خیال مصنوعی ذہانت (AI) کے بارے میں بات کرتے ہوئے ٹرمپ نے کہا کہ اگر کبھی مصنوعی ذہانت انسانیت کے خلاف ہوگئی تو امریکا کے پاس اسے روکنے کے لیے ’’کچھ نہ کچھ‘‘ ضرور ہوگا۔

برطانیہ کو توانائی اور امیگریشن کے مسائل کا سامنا ہے: ٹرمپ

امریکی صدر نے برطانیہ کی صورتحال پر بھی سخت تبصرہ کرتے ہوئے کہا کہ برطانیہ تباہی کے دہانے پر ہے اور ملک کو توانائی اور امیگریشن کے سنگین مسائل کا سامنا ہے۔

ٹرمپ کے مطابق برطانیہ میں توانائی کی قیمتیں ضرورت سے تین سے چار گنا زیادہ ہیں۔ انہوں نے برطانوی حکومت پر زور دیا کہ وہ شمالی سمندر میں موجود تیل اور گیس کے ذخائر سے فائدہ اٹھائے۔

امریکی صدر نے مزید کہا کہ اگر دنیا بھر سے برطانیہ آنے والے افراد کا سلسلہ نہ روکا گیا تو ملک اپنی شناخت کھو دے گا۔