مریم نواز کی سانحہ کاہنہ کے متاثرہ خاندانوں سے ملاقات، جاں بحق بچوں کے ورثا میں امدادی چیکس تقسیم

(لاہور) وزیراعلیٰ پنجاب مریم نواز شریف نے کاہنہ میں پیش آنے والے افسوسناک سانحے میں جاں بحق ہونے والے بچوں کے اہل خانہ سے ملاقات کی، ان سے تعزیت کا اظہار کیا اور حکومت پنجاب کی جانب سے ہر ممکن تعاون کی یقین دہانی کرائی۔

اس موقع پر سینئر صوبائی وزیر مریم اورنگزیب بھی وزیراعلیٰ کے ہمراہ موجود تھیں۔ مریم نواز نے متاثرہ والدین، خصوصاً سوگوار ماؤں سے ملاقات کی، انہیں گلے لگا کر دلاسہ دیا اور ان کے غم میں برابر کی شریک رہیں۔

وزیراعلیٰ پنجاب نے اس موقع پر کہا کہ "لفظ کم ہیں، غم بہت بڑا ہے۔" انہوں نے متاثرہ خاندانوں کو یقین دلایا کہ حکومت پنجاب انہیں اس مشکل وقت میں تنہا نہیں چھوڑے گی اور ہر ممکن مدد فراہم کی جائے گی۔

مریم نواز شریف نے اعلان کیا کہ حکومت پنجاب کی جانب سے جاں بحق ہونے والے ہر بچے کے ورثا کو 20 لاکھ روپے جبکہ زخمیوں کو 5 لاکھ روپے مالی امداد دی جائے گی۔ اس موقع پر انہوں نے متاثرہ خاندانوں میں امدادی چیکس بھی تقسیم کیے۔

وزیراعلیٰ نے متعلقہ حکام کو ہدایت کی کہ زخمی بچوں کو بہترین طبی سہولیات فراہم کی جائیں اور علاج میں کسی قسم کی کوتاہی نہ برتی جائے۔

انہوں نے کہا کہ دکھی ماؤں کے آنسوؤں کا مداوا کوئی مالی امداد نہیں کر سکتی، تاہم حکومت متاثرہ خاندانوں کے دکھ میں برابر کی شریک ہے اور ہر قدم پر ان کے ساتھ کھڑی رہے گی۔

مریم نواز نے مزید کہا کہ ننھے بچوں کا اس طرح اچانک بچھڑ جانا ایک انتہائی دلخراش سانحہ ہے، جس کا دکھ پوری قوم محسوس کر رہی ہے، اور حکومت متاثرہ خاندانوں کی ہر ممکن مدد جاری رکھے گی۔