میرپور کے لیے 10 الیکٹرک بسوں اور انٹرنیشنل ایئرپورٹ کا وعدہ، مریم نواز کے بڑے اعلانات

(میرپور) وزیراعلیٰ پنجاب مریم نواز نے میرپور میں انتخابی جلسے سے خطاب کرتے ہوئے کہا ہے کہ مسلم لیگ (ن) کی کامیابی کے بعد میرپور کے عوام کو 10 الیکٹرک بسوں کا تحفہ دیا جائے گا، جبکہ انٹرنیشنل ایئرپورٹ کی تعمیر کا وعدہ بھی پورا کیا جائے گا۔

اپنے خطاب میں مریم نواز نے کہا کہ وہ خود کو دل اور روح سے کشمیری سمجھتی ہیں کیونکہ ان کے دادا، دادی، نانا اور نانی سب کا تعلق کشمیر سے تھا۔ انہوں نے کہا کہ مظفرآباد میں خود کو "کشمیر کی بیٹی" کہنے پر بعض حلقوں نے اعتراض کیا، تاہم ان کا کشمیر سے گہرا خاندانی تعلق ہے۔

انہوں نے کہا کہ میرپور آکر ٹوٹی ہوئی سڑکیں دیکھ کر افسوس ہوا۔ ان کے بقول کشمیریوں نے ہمیشہ پاکستان کی ترقی میں اہم کردار ادا کیا ہے اور اب وقت آ گیا ہے کہ میرپور میں بھی ترقی اور خوشحالی کے نئے منصوبے شروع کیے جائیں۔

وزیراعلیٰ پنجاب نے کہا کہ نواز شریف نے میرپور میں انٹرنیشنل ایئرپورٹ بنانے کا وعدہ کیا ہے اور وہ جب بھی کوئی وعدہ کرتے ہیں اسے پورا کرتے ہیں۔

مریم نواز نے آزاد کشمیر میں ترقیاتی منصوبوں کی ضرورت پر زور دیتے ہوئے کہا کہ یہاں اورنج لائن، گرین بس، جدید اسپتال، مفت ادویات کی فراہمی، راشن کارڈ اور ہمت کارڈ جیسی عوامی سہولتوں کی کمی ہے، جسے مسلم لیگ (ن) کی قیادت پورا کر سکتی ہے۔

انہوں نے دعویٰ کیا کہ نواز شریف کی حکومتوں کے خلاف متعدد سازشیں کی گئیں، لیکن عوام کی حمایت کے باعث وہ ہمیشہ سیاسی میدان میں ثابت قدم رہے۔ ان کا کہنا تھا کہ اگر نواز شریف کے ترقیاتی منصوبوں کو نکال دیا جائے تو آزاد کشمیر میں ترقی کے بہت کم منصوبے باقی رہ جائیں گے۔

اپنی تقریر میں انہوں نے بلاول بھٹو زرداری کا نام لیے بغیر تنقید کرتے ہوئے کہا کہ کچھ سیاسی جماعتیں حکومت بنانے کا کریڈٹ تو لیتی ہیں، لیکن عوامی مسائل کے حل کی ذمہ داری وفاق پر ڈال دیتی ہیں۔

مریم نواز نے کہا کہ مسلم لیگ (ن) انتخابات میں کامیابی کے بعد آزاد کشمیر میں جدید سفری، طبی اور فلاحی سہولیات فراہم کرے گی، جبکہ میرپور کے عوام کو 10 الیکٹرک بسوں کا تحفہ بھی دیا جائے گا۔