میٹا کا واٹس ایپ ویب اور ونڈوز ایپ کے لیے اہم فیچر متعارف، پی ڈی ایف اب براہِ راست اوپن ہوگی

کیلیفورنیا: میٹا نے واٹس ایپ ویب اور ونڈوز ڈیسک ٹاپ ایپ استعمال کرنے والے صارفین کے لیے ایک اہم نیا فیچر متعارف کرا دیا ہے، جس کے ذریعے اب پی ڈی ایف فائلز کو ڈاؤن لوڈ کیے بغیر براہِ راست کھولا جا سکے گا۔

کمپنی نے اس سہولت کے لیے اڈوب کے ساتھ شراکت داری کی ہے، جس کے نتیجے میں اڈوب ایکروبیٹ کی سپورٹ واٹس ایپ ویب اور ونڈوز ایپ میں شامل کر دی گئی ہے۔

نئے فیچر کی بدولت صارفین چیٹ کے اندر ہی پی ڈی ایف فائلز دیکھ سکیں گے، جس سے فائل ڈاؤن لوڈ کرنے کی ضرورت ختم ہو جائے گی۔ اس کے علاوہ صارفین پی ڈی ایف پر ہائی لائٹ، اینوٹیشن اور دیگر بنیادی ایڈیٹنگ فیچرز بھی استعمال کر سکیں گے۔

میٹا کا کہنا ہے کہ ان تمام سہولیات کے باوجود واٹس ایپ کی اینڈ ٹو اینڈ انکرپشن برقرار رہے گی، جس سے صارفین کی رازداری اور ڈیٹا کا تحفظ یقینی بنایا جائے گا۔

کمپنی کے مطابق یہ نیا فیچر مرحلہ وار دنیا بھر میں واٹس ایپ ویب اور ونڈوز ڈیسک ٹاپ ایپ استعمال کرنے والے صارفین کے لیے جاری کر دیا گیا ہے، جس سے دستاویزات کا جائزہ لینا اور ان پر کام کرنا پہلے سے کہیں زیادہ آسان ہو جائے گا۔