پاکستانی ہیڈ کوچ مائیک ہیسن انگلینڈ ٹیم کی کوچنگ کے لیے شارٹ لسٹ، اینڈی فلاور بھی مضبوط امیدوار

(لندن) انگلینڈ کرکٹ ٹیم کے مستقل ہیڈ کوچ کی تقرری کے لیے نامور بین الاقوامی کوچز کے درمیان سخت مقابلے کی توقع ہے، جبکہ پاکستان کرکٹ ٹیم کے موجودہ ہیڈ کوچ مائیک ہیسن بھی شارٹ لسٹ کیے گئے امیدواروں میں شامل ہیں۔

برطانوی میڈیا رپورٹس کے مطابق انگلینڈ اینڈ ویلز کرکٹ بورڈ (ECB) نے برینڈن مکلم کے بعد مستقل ہیڈ کوچ کی تقرری کے لیے 9 امیدواروں کو شارٹ لسٹ کیا ہے۔ اس فہرست میں مائیک ہیسن کے علاوہ سابق انگلینڈ ہیڈ کوچ اینڈی فلاور، اسٹیفن فلیمنگ، جسٹن لینگر، ٹام موڈی اور کمار سنگاکارا جیسے معروف کوچز بھی شامل ہیں۔

رپورٹس کے مطابق انگلینڈ سے تعلق رکھنے والے امیدواروں میں جوناتھن ٹراٹ، سابق آئرلینڈ اور ہیمپشائر کوچ ایڈی بیرل اور سابق اوپنر مارکس ٹریسکوتھک بھی مضبوط امیدوار تصور کیے جا رہے ہیں۔

برطانوی ذرائع کا کہنا ہے کہ انگلینڈ کی حالیہ ناقص کارکردگی کے بعد بورڈ نئے ہیڈ کوچ کی تلاش میں تیزی لے آیا ہے۔ ٹیم اپنے گزشتہ 9 ٹیسٹ میچز میں سے 7 میں شکست کھا چکی ہے، جس کے باعث کوچنگ سیٹ اپ میں بڑی تبدیلیوں پر غور کیا جا رہا ہے۔

رپورٹس کے مطابق پاکستان کے خلاف آئندہ سیریز کے لیے ایک عبوری ہیڈ کوچ مقرر کیے جانے کا امکان ہے، جبکہ مستقل کوچ کی تقرری کے لیے شارٹ لسٹ امیدواروں سے رابطوں اور مشاورت کا عمل جاری ہے۔

اگر مائیک ہیسن کو انگلینڈ کی کوچنگ کی ذمہ داری سونپی جاتی ہے تو یہ ان کے بین الاقوامی کوچنگ کیریئر کا ایک اہم سنگِ میل ہوگا، تاہم اس حوالے سے ابھی تک انگلینڈ اینڈ ویلز کرکٹ بورڈ کی جانب سے کوئی باضابطہ اعلان سامنے نہیں آیا ہے۔