امریکی صدر کی دھمکیاں مایوسی کی علامت ہیں، ٹرمپ شدید بے بسی کا شکار ہیں: محسن رضائی

تہران: ایرانی سپریم لیڈر کے مشیر محسن رضائی نے امریکی صدر ڈونلڈ ٹرمپ کے حالیہ بیان پر سخت ردعمل دیتے ہوئے کہا ہے کہ ان کی دھمکیاں مایوسی اور بے بسی کی علامت ہیں۔

محسن رضائی نے سماجی رابطے کے پلیٹ فارم ایکس پر جاری اپنے بیان میں کہا کہ شلمچہ میں زائرین پر حملہ امریکا کی شدید ناکامی اور بے بسی کا ثبوت ہے۔ ان کے بقول امریکی قیادت اپنے مقاصد حاصل کرنے میں ناکامی کے بعد اشتعال انگیز بیانات دے رہی ہے۔

انہوں نے کہا کہ ایران مسلسل فوجی حملوں کا سامنا کرنے کے باوجود مؤثر جوابی کارروائیاں جاری رکھے ہوئے ہے اور ملکی دفاع سے پیچھے نہیں ہٹے گا۔

محسن رضائی کا کہنا تھا کہ اگر ایران کے بنیادی ڈھانچے (انفراسٹرکچر) کو نشانہ بنایا گیا تو اس کا جواب انتہائی سخت اور شدید ہوگا۔

انہوں نے مزید کہا کہ امریکی صدر ڈونلڈ ٹرمپ حقیقت پسندانہ فیصلے کرنے کے بجائے ایسے بیانات دے رہے ہیں جو ان کی بڑھتی ہوئی مایوسی کی عکاسی کرتے ہیں۔ ان کے مطابق ایران اپنے دفاع اور قومی مفادات کے تحفظ کے لیے ہر ضروری اقدام جاری رکھے گا۔