نصیر الدین شاہ کا مودی حکومت پر شدید حملہ، دہلی میں طلبہ پر پولیس تشدد کی مذمت، کہا "سب یاد رکھا جائے گا"

نئی دہلی: بالی وڈ کے معروف اور سینئر اداکار نصیر الدین شاہ نے نئی دہلی میں احتجاج کرنے والے طلبہ پر پولیس کے مبینہ لاٹھی چارج کی سخت مذمت کرتے ہوئے حکومت اور قانون نافذ کرنے والے اداروں پر شدید تنقید کی ہے۔

سوشل میڈیا پر جاری اپنے جذباتی پیغام میں نصیر الدین شاہ نے کہا کہ اگر کسی ملک کی قیادت ایک جاہل شخص کے ہاتھ میں ہو تو وہ پورے معاشرے کو بھی جاہل، ناسمجھ، نااہل اور بے رحم دیکھنا چاہتا ہے۔

انہوں نے کہا کہ طلبہ کے ساتھ ہونے والا سلوک دیکھ کر ان کا دل غم اور غصے سے بھر گیا ہے۔ ان کے بقول، پولیس اہلکاروں کا رویہ انہیں امریکا کے امیگریشن ادارے ICE کے اہلکاروں کی یاد دلاتا ہے، جو چہروں پر نقاب اور ہاتھوں میں ڈنڈے لیے شہریوں کے خلاف کارروائیاں کرتے ہیں۔

اداکار نے پولیس اہلکاروں کو مخاطب کرتے ہوئے کہا کہ وہ اپنے بچوں کے مستقبل کے بارے میں بھی سوچیں اور یہ یاد رکھیں کہ ہر عمل کا ایک دن حساب ضرور ہوتا ہے۔

نصیر الدین شاہ نے احتجاج کرنے والے طلبہ کو حوصلہ دیتے ہوئے کہا کہ وہ اپنی جدوجہد جاری رکھیں کیونکہ ملک میں بہت سے لوگ ان کے ساتھ کھڑے ہیں۔ انہوں نے کہا کہ حکومت کو یہ نہیں بھولنا چاہیے کہ عوام سب کچھ یاد رکھتے ہیں اور وقت آنے پر ہر عمل کا جواب دیا جاتا ہے۔

دوسری جانب بھارتی میڈیا کے مطابق نوجوانوں کی سیاسی جماعت کاکروچ جنتا پارٹی نے وزیر تعلیم کے استعفے کے مطالبے کے لیے پارلیمنٹ کی جانب مارچ کیا، جسے روکنے کے لیے پولیس نے لاٹھی چارج کیا۔ اس واقعے کے بعد ملک بھر میں طلبہ کے احتجاج اور حکومتی اقدامات پر بحث کا سلسلہ جاری ہے۔