بلوچستان حکومت اور دھرنا کمیٹی کے درمیان مذاکرات کامیاب، تحریری معاہدہ طے پا گیا

(کوئٹہ) حکومت بلوچستان اور دھرنا کمیٹی کے درمیان جاری مذاکرات کامیابی سے مکمل ہوگئے، جس کے بعد دونوں فریقوں کے درمیان تحریری معاہدہ طے پا گیا۔ معاہدے کے تحت شہدائے زیارت کے لواحقین کے مطالبات پر عملدرآمد اور صوبے میں امن و استحکام کے لیے مشترکہ اقدامات پر اتفاق کیا گیا۔

معاہدے کے مطابق شہدائے زیارت کے واقعے کی تحقیقات کے لیے جوڈیشل کمیشن تشکیل دیا جائے گا تاکہ واقعے کے تمام پہلوؤں کا شفاف جائزہ لیا جا سکے۔

اس کے علاوہ وزیراعلیٰ بلوچستان میر سرفراز بگٹی کی سربراہی میں صوبے کی امن و امان کی صورتحال پر اپوزیشن جماعتوں اور شہداء کے لواحقین کا مشترکہ اجلاس بھی منعقد کیا جائے گا، جس میں امن کے قیام اور عوامی تحفظ سے متعلق امور پر مشاورت کی جائے گی۔

فریقین نے اس بات پر بھی اتفاق کیا کہ بلوچستان کے شہری علاقوں میں پولیس فورس کی استعداد، افرادی قوت اور پیشہ ورانہ صلاحیتوں میں مزید اضافہ کیا جائے گا تاکہ امن و امان کی صورتحال کو مؤثر بنایا جا سکے۔

معاہدے کے تحت شہدائے زیارت کو مروجہ حکومتی پالیسی کے مطابق شہید کا درجہ دیا جائے گا، جبکہ ان کے اہل خانہ کی کفالت، بچوں کی تعلیم اور مالی معاوضہ بھی سرکاری پالیسی کے تحت فراہم کیا جائے گا۔ مزید برآں شہداء کی قربانیوں کو خراج عقیدت پیش کرنے کے لیے مختلف سرکاری عمارتیں ان کے نام سے منسوب کی جائیں گی۔

ریونیو سے متعلق عوامی تحفظات کے ازالے کے لیے وزیر ریونیو کی سربراہی میں ایک خصوصی کمیٹی قائم کرنے کا بھی فیصلہ کیا گیا ہے۔ اس کمیٹی میں متعلقہ سرکاری افسران کے ساتھ علاقے کے معتبرین کو بھی شامل کیا جائے گا تاکہ عوامی مسائل کا مؤثر حل نکالا جا سکے۔

وزیراعلیٰ بلوچستان میر سرفراز بگٹی نے کہا کہ شہداء قوم کا قیمتی سرمایہ ہیں اور ان کے اہل خانہ کی ہر ممکن دیکھ بھال حکومت بلوچستان کی ذمہ داری ہے۔ انہوں نے کہا کہ پاک فوج، فرنٹیئر کور (ایف سی)، پولیس اور دیگر قانون نافذ کرنے والے اداروں کی قربانیوں کو پوری قوم قدر کی نگاہ سے دیکھتی ہے۔

حکومتی مذاکراتی کمیٹی کی سربراہی وزیر صحت بخت کاکڑ نے کی، جبکہ کمیٹی میں صوبائی وزراء ضیاء لانگو، سلیم خان کھوسہ، میر عاصم کرد گیلو، سینیٹر منظور کاکڑ، بلال کاکڑ اور کمشنر کوئٹہ شاہ زیب کاکڑ بھی شامل تھے۔