ندا یاسر کی شادی شدہ مردوں کے والدین پر انحصار پر تنقید، خودمختاری کو وقت کی ضرورت قرار دے دیا

(کراچی) پاکستان کی معروف ٹی وی میزبان ندا یاسر نے بچوں کو خودمختار بنانے کی اہمیت پر زور دیتے ہوئے کہا ہے کہ والدین کو چاہیے کہ وہ اپنے بچوں کی شادی اس وقت کریں جب وہ مالی طور پر اپنے اخراجات اٹھانے کے قابل ہو جائیں۔

سوشل میڈیا پر وائرل ہونے والے ایک کلپ میں ندا یاسر نے پاکستان میں شادی شدہ مردوں کے والدین پر مالی انحصار کے رجحان پر گفتگو کرتے ہوئے کہا کہ بچوں کو شروع سے ہی ذمہ دار اور خودمختار بنانا ضروری ہے۔

ندا یاسر کا کہنا تھا کہ والدین کو چاہیے کہ وہ بچوں کو اپنے پیروں پر کھڑا کریں اور ان کی شادیاں بھی اس وقت کریں جب وہ کمانے کے قابل ہو جائیں۔

میزبان نے مغربی ممالک کا حوالہ دیتے ہوئے کہا کہ وہاں اکثر نوجوان کم عمری میں کام شروع کر دیتے ہیں اور 18 سال کی عمر تک اپنے کئی اخراجات خود اٹھانے لگتے ہیں۔

انہوں نے کہا کہ پاکستان میں صورتحال مختلف ہے، جہاں بعض اوقات والدین بچوں کی ضروریات پوری کرتے رہتے ہیں، جبکہ بعض حالات میں کم عمر افراد بھی خاندان کی ذمہ داریاں اٹھا رہے ہوتے ہیں۔

ندا یاسر نے کہا کہ بچوں کو صرف تعلیم دلانا یا ان کے اخراجات پورے کرنا کافی نہیں بلکہ انہیں زندگی میں خود فیصلے کرنے اور ذمہ داریاں نبھانے کے قابل بنانا بھی والدین کی ذمہ داری ہے۔

انہوں نے مزید کہا کہ بچوں کو خودمختار بنانے کا رجحان مضبوط ہونا چاہیے تاکہ وہ مستقبل میں بہتر انداز میں اپنی زندگی گزار سکیں۔