بات پکی ہوئی نہ منگنی، بلاول بھٹو نے شادی سے متعلق جعلی خبروں کی تردید کردی

اسلام آباد: چیئرمین پاکستان پیپلز پارٹی بلاول بھٹو زرداری نے سوشل میڈیا پر اپنی منگنی اور شادی سے متعلق گردش کرنے والی خبروں کو جعلی قرار دیتے ہوئے واضح کردیا کہ نہ ان کی بات پکی ہوئی ہے، نہ منگنی ہوئی ہے اور نہ ہی وہ مبینہ طور پر زیرِ بحث آنے والی ’پرنسز گلوریا‘ کو جانتے ہیں۔

سماجی رابطے کی ویب سائٹ ایکس پر جاری ایک ویڈیو بیان میں بلاول بھٹو زرداری نے سوشل میڈیا پر پھیلنے والی افواہوں پر ردعمل دیتے ہوئے کہا کہ سوشل میڈیا نے تو ان کی بات پکی بھی کروا دی، منگنی بھی اور شادی بھی کروا دی، لیکن حقیقت میں ایسا کچھ نہیں ہوا۔

چیئرمین پیپلز پارٹی نے کہا کہ ان کی شادی اور منگنی سے متعلق خبریں بے بنیاد ہیں اور سوشل میڈیا پر بغیر تصدیق کے ایسی اطلاعات پھیلائی جارہی ہیں۔

بلاول بھٹو زرداری کا مزید کہنا تھا کہ سوشل میڈیا پر اس قسم کے تماشے اکثر حقیقی اور اہم عوامی مسائل سے توجہ ہٹانے کے لیے کیے جاتے ہیں۔

انہوں نے عوام سے اپیل کی کہ سوشل میڈیا پر گردش کرنے والی خبروں پر یقین کرنے سے قبل ان کی تصدیق ضرور کی جائے۔