امریکی فوجیوں کی ہلاکت کے جواب میں ایران پر شدید حملہ کیا، کارروائیاں جاری رہیں گی: صدر ٹرمپ

واشنگٹن: امریکی صدر ڈونلڈ ٹرمپ نے کہا ہے کہ امریکی فوجیوں کی ہلاکت کے جواب میں امریکا نے ایران کے خلاف شدید فوجی کارروائی کی ہے اور ایرانی اہداف کو سخت نقصان پہنچایا گیا ہے۔

فیفا فٹبال ورلڈ کپ کے فائنل کے بعد واشنگٹن واپسی پر صحافیوں سے گفتگو کرتے ہوئے صدر ٹرمپ نے کہا کہ امریکی فوجیوں کی ہلاکت پر پوری قوم کو گہرا دکھ ہے۔ ان کے بقول، ہلاک ہونے والے فوجی اس مقصد کے لیے خدمات انجام دے رہے تھے کہ ایران ایٹمی ہتھیار حاصل نہ کر سکے۔

ٹرمپ نے کہا کہ انہی فوجیوں کو خراجِ عقیدت پیش کرنے کے لیے ایران پر انتہائی سخت حملہ کیا گیا۔ انہوں نے دعویٰ کیا کہ حالیہ کارروائیوں کے نتیجے میں ایران کی عسکری صلاحیت کو شدید نقصان پہنچا ہے۔

امریکی صدر کے مطابق ایران کے پاس اب بھی کچھ میزائل، ڈرون اور محدود پیداواری صلاحیت موجود ہے، تاہم ان کا کہنا تھا کہ ایران اپنی زیادہ تر فوجی طاقت کھو چکا ہے۔

صدر ٹرمپ نے مزید دعویٰ کیا کہ آبنائے ہرمز پر اب امریکا کا کنٹرول ہے اور ایران وہاں کسی مؤثر کنٹرول کی پوزیشن میں نہیں رہا۔ انہوں نے کہا کہ امریکا نے ایک بار پھر ایرانی اہداف کو سختی سے نشانہ بنایا اور یہ کارروائی ہلاک ہونے والے تین امریکی فوجیوں کے اعزاز میں کی گئی۔

دوسری جانب امریکی سینٹرل کمانڈ (سینٹکام) نے سوشل میڈیا پلیٹ فارم ایکس پر جاری بیان میں کہا ہے کہ ایران کے خلاف مسلسل نویں رات بھی فوجی کارروائیاں کی گئیں، جن میں ڈرون اور میزائل لانچ سائٹس کو نشانہ بنایا گیا۔

سینٹکام کے مطابق ان حملوں کا مقصد ایران کی ان فوجی صلاحیتوں کو مزید کمزور کرنا ہے جو آبنائے ہرمز سے گزرنے والے تجارتی جہازوں اور شہری ملاحوں کے خلاف حملوں میں استعمال ہو رہی ہیں۔

صدر ٹرمپ نے گفتگو کے دوران فیفا فٹبال ورلڈ کپ کا بھی ذکر کیا اور کہا کہ یہ کھیلوں کی دنیا کا ایک عظیم ایونٹ ہے۔ انہوں نے فیفا کے صدر اور ان کی ٹیم کو کامیاب ٹورنامنٹ کے انعقاد پر مبارکباد دیتے ہوئے کہا کہ دنیا بھر سے آنے والے شائقین نے امریکا کا مثبت تاثر اپنے ساتھ لے کر گئے۔