پاک فضائیہ کی شاندار کارکردگی جراتمند قیادت اور بہترین منصوبہ بندی کا نتیجہ ہے: صدر، وزیراعظم

اسلام آباد: صدر مملکت آصف علی زرداری اور وزیراعظم محمد شہباز شریف نے یومِ پاک فضائیہ کے موقع پر اپنے الگ الگ پیغامات میں پاک فضائیہ کے شاہینوں کو خراج تحسین پیش کیا اور ان کی پیشہ ورانہ صلاحیتوں اور قومی خدمات کو سراہا۔

صدر مملکت آصف علی زرداری نے اپنے بیان میں کہا کہ معرکۂ حق میں پاک فضائیہ نے پاک فوج اور پاک بحریہ کے ساتھ مل کر فیصلہ کن کردار ادا کیا۔ انہوں نے کہا کہ پاک فضائیہ کے شاہینوں نے ثابت کیا کہ دشمن کتنا ہی طاقتور کیوں نہ ہو، عزم، حوصلے اور قومی جذبے کو شکست نہیں دے سکتا۔

صدر مملکت کا کہنا تھا کہ پاک فضائیہ کی شاندار کارکردگی کے پیچھے جراتمند قیادت، بہترین منصوبہ بندی اور غیر معمولی پیشہ ورانہ صلاحیتیں کارفرما ہیں۔ انہوں نے ملک کے دفاع کے لیے پاک فضائیہ کی خدمات اور قربانیوں کو خراج تحسین پیش کیا۔

دوسری جانب وزیراعظم محمد شہباز شریف نے بھی یومِ پاک فضائیہ کے موقع پر پاک فضائیہ کے لیے پیشہ ورانہ کامیابی اور مزید ترقی کے لیے نیک تمناؤں کا اظہار کیا۔

وزیراعظم نے اپنے پیغام میں کہا کہ پاک فضائیہ نے ہمیشہ فضائی معرکوں میں اپنی پیشہ ورانہ صلاحیت، مہارت اور برتری کا لوہا منوایا ہے۔ ان کا کہنا تھا کہ پاک فضائیہ ایک ممتاز ادارہ ہے جو قربانی، شجاعت اور پیشہ ورانہ مہارت کی قابل فخر تاریخ رکھتا ہے۔

شہباز شریف نے کہا کہ جنگِ ستمبر میں پاک فضائیہ کے شاہینوں نے کامیابی سے ملکی فضائی حدود کا دفاع کیا۔ ان کے مطابق گزشتہ سال مئی میں بھی پاکستان نے جارح دشمن کا مؤثر مقابلہ کیا اور پاک فضائیہ نے مسلح افواج کی دیگر سروسز کے ساتھ مثالی ہم آہنگی کا مظاہرہ کیا۔

وزیراعظم نے مزید کہا کہ پاک فضائیہ نے ایک بار پھر تعداد میں کم ہوتے ہوئے بھی دشمن کا مقابلہ کرنے کی اپنی شاندار روایت کو برقرار رکھا۔ انہوں نے پاک فضائیہ کے افسران، جوانوں اور اہلکاروں کی خدمات، قربانیوں اور جذبۂ حب الوطنی کو سراہا۔