افواجِ پاکستان کا یومِ دفاع پر شہدائے پاکستان کو خراجِ عقیدت

اسلام آباد: یومِ دفاع و شہدا کے موقع پر فیلڈ مارشل سید عاصم منیر، نیول اور ایئر چیف سمیت افواجِ پاکستان نے شہدائے پاکستان کو خراجِ عقیدت پیش کرتے ہوئے ان کی عظیم قربانیوں کو قومی طاقت اور فخر کا سرچشمہ قرار دیا ہے۔

پاک فوج کے شعبہ تعلقات عامہ (آئی ایس پی آر) کی جانب سے جاری بیان کے مطابق شہدا کی بے مثال قربانیاں، غازیوں کا جذبہ اور شہدا کے خاندانوں کی استقامت قوم کے لیے ہمیشہ باعثِ فخر رہیں گے۔

آئی ایس پی آر نے کہا کہ شہدائے پاکستان فرض، عزت اور قربانی کی اعلیٰ ترین اقدار کی علامت ہیں۔ میدانِ جنگ، فضاؤں اور سمندروں میں وطن کے محافظوں نے ملک کے دفاع کے لیے اپنی جانوں کا نذرانہ پیش کیا۔

بیان کے مطابق شہدا کی لازوال قربانیاں آنے والی نسلوں کے لیے مشعلِ راہ ہیں، جبکہ شہدا کے خاندان استقامت، حوصلے اور قربانی کی پائیدار علامت ہیں۔

آئی ایس پی آر کا کہنا ہے کہ مسلح افواج ملکی خودمختاری، علاقائی سالمیت اور قومی مفادات کے دفاع کے لیے مکمل طور پر تیار ہیں۔ پاکستان خطے میں امن، استحکام اور خوشحالی کا خواہاں ہے اور پرامن بقائے باہمی کے لیے پرعزم ہے۔

آئی ایس پی آر نے واضح کیا کہ پاکستان کی امن کی خواہش کو کمزوری نہ سمجھا جائے، پاکستان کے خلاف کسی بھی جارحیت کا فوری اور فیصلہ کن جواب دیا جائے گا۔