واشنگٹن ڈی سی میں یومِ دفاعِ پاکستان کی خصوصی تقریب، شہداء اور مسلح افواج کو خراجِ عقیدت

واشنگٹن ڈی سی میں پاکستان کے سفارت خانے میں یومِ دفاعِ پاکستان کے حوالے سے خصوصی تقریب کا انعقاد کیا گیا، جس میں مختلف ممالک سے تعلق رکھنے والے دفاعی ماہرین، اعلیٰ فوجی افسران، سفارتی شخصیات اور پاکستانی کمیونٹی کے نمائندگان نے شرکت کی۔

تقریب سے امریکہ میں پاکستان کے سفیر رضوان سعید شیخ نے خصوصی خطاب کرتے ہوئے 6 ستمبر 1965ء کی لازوال یاد کو خراجِ عقیدت پیش کیا۔ انہوں نے پاکستان کی دفاعی تاریخ میں قوم اور مسلح افواج کی قربانیوں، بہادری اور عزم کو اجاگر کیا۔

سفیر رضوان سعید شیخ نے اپنے خطاب میں معرکۂ حق اور ’’بنیان المرصوص‘‘ کا بھی خصوصی طور پر ذکر کرتے ہوئے کہا کہ پاکستان اپنے دفاع کے ساتھ ساتھ سفارتی محاذ پر بھی ہمہ وقت تیار اور متحرک ہے۔

انہوں نے زور دیا کہ پاکستان کی سلامتی، خودمختاری اور قومی مفادات کے تحفظ کے لیے مضبوط دفاعی صلاحیت کے ساتھ ساتھ مؤثر اور فعال سفارت کاری بھی انتہائی اہمیت رکھتی ہے۔

تقریب میں شریک مختلف ممالک کے دفاعی ماہرین، اعلیٰ فوجی افسران اور سفارتی نمائندگان کے علاوہ پاکستانی کمیونٹی کے افراد نے بھی پاکستان کے شہداء اور غازیوں کو خراجِ عقیدت پیش کیا۔

شرکاء نے ملکی دفاع، قومی خودمختاری اور قومی یکجہتی کے لیے اپنے عزم کا اعادہ کرتے ہوئے پاکستان کی مسلح افواج کی قربانیوں اور خدمات کو سراہا۔