پاکستان، ترکیہ اور سعودی عرب کا دفاعی تعاون مزید مضبوط بنانے پر اتفاق

استنبول: پاکستان، ترکیہ اور سعودی عرب نے مشترکہ دفاعی تعاون کو مزید مضبوط بنانے اور خطے میں پائیدار امن و استحکام کے لیے مل کر کام کرنے کے عزم کا اعادہ کیا ہے۔

مشترکہ دفاع سے متعلق مکہ معاہدے کے تحت قائم اسٹریٹجک سیاسی و دفاعی کمیٹی کا اجلاس استنبول میں منعقد ہوا، جس میں تینوں ممالک کے وزرائے خارجہ، وزرائے دفاع، چیفس آف ڈیفنس فورسز اور چیفس آف جنرل اسٹاف نے شرکت کی۔

اجلاس کے بعد جاری مشترکہ اعلامیے کے مطابق پاکستان، ترکیہ اور سعودی عرب نے خطے میں کشیدگی میں کمی، تحمل کے فروغ اور پائیدار امن کے لیے مشترکہ کوششیں جاری رکھنے پر اتفاق کیا۔

اعلامیے میں کہا گیا کہ مکہ معاہدے کے تحت تینوں ممالک کے درمیان تعاون کو مزید ادارہ جاتی شکل دی جائے گی، جبکہ منصفانہ، جامع اور دیرپا امن کے لیے علاقائی تعاون اور مشترکہ سلامتی کے نظام کو فروغ دیا جائے گا۔

پاکستان، ترکیہ اور سعودی عرب نے مشترکہ سرگرمیوں کے ذریعے دفاعی صنعتی تعاون کو مضبوط بنانے اور جدید دفاعی ٹیکنالوجی کی ترقی کے لیے مل کر کام کرنے پر بھی اتفاق کیا۔

مشترکہ اعلامیے کے مطابق تینوں ممالک اپنی دفاعی صلاحیتوں کے ساتھ ساتھ مسلح افواج کے درمیان باہمی رابطے اور ہم آہنگی کو مزید مؤثر بنائیں گے۔

اعلامیے میں اس عزم کا اظہار کیا گیا کہ مکہ معاہدے پر مؤثر عملدرآمد کے ذریعے پاکستان، ترکیہ اور سعودی عرب علاقائی امن و استحکام کے لیے اہم کردار ادا کرتے ہوئے مشترکہ دفاعی تعاون کو نئی سطح پر لے جائیں گے۔