حکومت نے پیٹرول اور ڈیزل کی قیمتوں میں اضافہ کر دیا، نئی قیمتوں کا اطلاق فوری

وفاقی حکومت نے پیٹرولیم مصنوعات کی قیمتوں میں اضافے کا اعلان کرتے ہوئے نوٹیفکیشن جاری کر دیا ہے۔ پیٹرولیم ڈویژن کے مطابق نئی قیمتوں کا اطلاق 18 جولائی سے 20 جولائی تک ہوگا۔

جاری کردہ نوٹیفکیشن کے مطابق پیٹرول کی قیمت میں 5 روپے 44 پیسے فی لیٹر اضافہ کیا گیا ہے، جس کے بعد پیٹرول کی نئی قیمت 316 روپے 15 پیسے فی لیٹر مقرر کر دی گئی ہے۔

اسی طرح ہائی اسپیڈ ڈیزل کی قیمت میں 31 روپے 5 پیسے فی لیٹر کا نمایاں اضافہ کیا گیا ہے، جس کے بعد ڈیزل 354 روپے 35 پیسے فی لیٹر میں دستیاب ہوگا۔

حکومت کا کہنا ہے کہ نئی قیمتیں تین روز کے لیے مؤثر رہیں گی۔ ڈیزل کی قیمت میں بڑے اضافے کے باعث ٹرانسپورٹ، زرعی شعبے اور اشیائے ضروریہ کی ترسیل کے اخراجات بڑھنے کا امکان ہے، جس سے مہنگائی پر مزید دباؤ پڑ سکتا ہے۔

وفاقی وزیر پیٹرولیم علی پرویز ملک نے قیمتوں میں اضافے کی وجہ عالمی منڈی میں خام تیل کی بڑھتی ہوئی قیمتوں کو قرار دیا۔ ان کا کہنا تھا کہ خطے میں بڑھتی ہوئی جنگی کشیدگی کے باعث عالمی توانائی مارکیٹ شدید دباؤ کا شکار ہے، جس کے اثرات پاکستان سمیت کئی ممالک پر پڑ رہے ہیں۔

انہوں نے بتایا کہ عالمی مارکیٹ میں ہائی اسپیڈ ڈیزل کی قیمت چند روز کے دوران 110 ڈالر فی بیرل سے بڑھ کر 140 ڈالر فی بیرل تک پہنچ گئی ہے، جبکہ پیٹرول کی قیمت بھی 100 ڈالر فی بیرل کے قریب جا پہنچی ہے۔

وفاقی وزیر کے مطابق وزیراعظم اور وفاقی کابینہ نے پیٹرولیم مصنوعات کی قیمتوں کے تعین کا طریقہ کار تبدیل کرنے کی منظوری دے دی ہے، جس کے تحت اب آئل اینڈ گیس ریگولیٹری اتھارٹی (اوگرا) روزانہ کی بنیاد پر قیمتوں کا تعین کرے گی۔

انہوں نے کہا کہ پیٹرول اور ڈیزل کی یومیہ قیمت گزشتہ سات روز کی اوسط عالمی قیمت کو بنیاد بنا کر مقرر کی جائے گی، جبکہ اوگرا روزانہ نئی قیمتیں اپنی ویب سائٹ پر جاری کرے گی۔

علی پرویز ملک کا کہنا تھا کہ اس نئے نظام سے قیمتوں کے تعین میں شفافیت آئے گی اور عوام کے لیے یہ جاننا آسان ہوگا کہ پیٹرولیم مصنوعات کی قیمتیں کن عوامل کی بنیاد پر مقرر کی جا رہی ہیں۔ انہوں نے مزید بتایا کہ عالمی قیمتوں میں اتار چڑھاؤ کے مطابق اوگرا حکومت سے الگ منظوری لیے بغیر بھی قیمتوں میں ردوبدل کر سکے گی۔