وزیراعظم کی پی ٹی آئی کو لانگ مارچ ختم کرکے مذاکرات کی پیشکش

اسلام آباد: وزیراعظم محمد شہباز شریف نے تحریک انصاف کو لانگ مارچ اور دھرنوں کی سیاست ختم کرکے حکومت سے مذاکرات کرنے کی پیشکش کردی۔

اسلام آباد میں کشمیر چوک انڈرپاس کے سنگ بنیاد کی تقریب سے خطاب کرتے ہوئے وزیراعظم شہباز شریف نے کہا کہ حکومت نے اتفاق رائے سے فیصلہ کیا تھا کہ پی ٹی آئی کی قیادت کے ساتھ بامعنی اور بامقصد مذاکرات کیے جائیں اور باہمی بات چیت کے ذریعے مسائل کا حل تلاش کیا جائے۔

وزیراعظم نے بتایا کہ حکومتی کمیٹی نے پی ٹی آئی سے اسپیکر چیمبر میں دو روز مذاکرات کیے۔ امید تھی کہ بات چیت کے مثبت نتائج سامنے آئیں گے اور دھرنوں کی سیاست کو خیرباد کہا جائے گا، تاہم پی ٹی آئی وفد کی جانب سے طے شدہ معاملات میں تبدیلی کا مطالبہ کیا گیا۔

شہباز شریف نے کہا کہ دھرنوں اور لانگ مارچ کی سیاست کا پہلا نشانہ ملکی معیشت بنتی ہے۔ ان کے مطابق گزشتہ ڈھائی سال میں ٹیم ورک کے ذریعے معیشت کو مستحکم کرنے کی کوشش کی گئی اور اب معاشی ترقی کا وقت ہے۔

انہوں نے کہا کہ پاکستان کی ترسیلات زر اور آئی ٹی برآمدات میں اضافہ ہوا ہے، جبکہ ملکی ترقی کے پہیے کو دوبارہ روکنے کی کوشش کی جارہی ہے۔ وزیراعظم کا کہنا تھا کہ قانون اپنا راستہ لے گا اور منفی پروپیگنڈے کو کامیاب نہیں ہونے دیا جائے گا۔

وزیراعظم نے پی ٹی آئی کو مخاطب کرتے ہوئے کہا کہ وہ سوچے کہ لانگ مارچ اور دھرنوں کی موجودہ حکمت عملی ملک کے لیے فائدہ مند ہے یا نقصان دہ۔ انہوں نے واضح کیا کہ اگر لانگ مارچ اور دھرنے ختم کیے جائیں تو حکومت پی ٹی آئی کے ساتھ بیٹھ کر مذاکرات کرے گی۔

شہباز شریف نے مزید کہا کہ عوام کے جان و مال کا تحفظ حکومت کی ذمہ داری ہے اور قوم کی خواہش ہے کہ پاکستان محنت، امانت اور دیانت کے ساتھ آگے بڑھے۔