مری میں حکمران جماعت کی اہم بیٹھک، سیاسی و معاشی صورتحال، آزاد کشمیر انتخابات اور ایران۔امریکہ کشیدگی پر مشاورت

(مری) حکمران جماعت کی اعلیٰ قیادت کا ایک اہم اجلاس مری میں منعقد ہوا، جس میں ملک کی مجموعی سیاسی، معاشی اور سفارتی صورتحال پر تفصیلی غور کیا گیا۔ اجلاس میں قومی سطح پر درپیش چیلنجز، آئندہ سیاسی حکمت عملی اور اہم علاقائی معاملات پر بھی تبادلۂ خیال کیا گیا۔

ذرائع کے مطابق اجلاس میں آزاد کشمیر کی موجودہ سیاسی صورتحال اور آئندہ انتخابات کے حوالے سے مختلف تجاویز اور حکمت عملی کا جائزہ لیا گیا۔ اس کے علاوہ مسلم لیگ (ن) کے قائد میاں نواز شریف کے میرپور میں متوقع عوامی جلسے کے انتظامات اور پارٹی سرگرمیوں پر بھی تفصیلی مشاورت کی گئی۔

ذرائع کا کہنا ہے کہ وزیراعظم شہباز شریف نے اجلاس کے شرکا کو پٹرولیم مصنوعات کی قیمتوں میں حالیہ اضافے کی وجوہات سے آگاہ کرتے ہوئے ملکی معاشی حالات، عالمی منڈی میں تیل کی قیمتوں اور حکومتی پالیسی سے متعلق بریفنگ دی۔

اجلاس کے دوران نائب وزیراعظم اور وزیر خارجہ اسحاق ڈار نے ایران اور امریکہ کے درمیان بڑھتی ہوئی کشیدگی کے تناظر میں پاکستان کی سفارتی کوششوں اور خطے میں امن و استحکام کے لیے جاری رابطوں پر بھی شرکا کو اعتماد میں لیا۔

ذرائع کے مطابق اجلاس میں مسلم لیگ (ن) کے قائد میاں نواز شریف، وزیراعظم شہباز شریف، وزیراعلیٰ پنجاب مریم نواز، نائب وزیراعظم و وزیر خارجہ اسحاق ڈار سمیت شریف خاندان کے دیگر اہم افراد نے شرکت کی۔ اجلاس میں آئندہ سیاسی سرگرمیوں، عوامی رابطہ مہم اور ملکی صورتحال کے مختلف پہلوؤں پر بھی غور کیا گیا۔