پاکستان میں پولیو وائرس کی موجودگی میں نمایاں کمی، 2026 میں اب تک صرف 3 کیسز رپورٹ
نیشنل ایمرجنسی آپریشن سینٹر (ای او سی) کی تازہ رپورٹ کے مطابق پاکستان میں پولیو وائرس کی موجودگی میں نمایاں کمی ریکارڈ کی گئی ہے۔ 2026 کے پہلے چھ ماہ میں مثبت ماحولیاتی نمونے 48.1 فیصد سے کم ہو کر 13.1 فیصد رہ گئے، جبکہ رواں سال اب تک ملک میں پولیو کے صرف 3 کیسز کی تصدیق ہوئی ہے
اسلام آباد: نیشنل ایمرجنسی آپریشن سینٹر (ای او سی) نے ملک میں پولیو وائرس کی موجودگی میں نمایاں کمی ریکارڈ ہونے کی خوشخبری سناتے ہوئے تازہ رپورٹ جاری کر دی ہے، جس کے مطابق رواں سال کے پہلے چھ ماہ کے دوران پولیو وائرس کے پھیلاؤ میں واضح کمی دیکھی گئی ہے۔
رپورٹ کے مطابق گزشتہ سال کے مقابلے میں رواں سال کے پہلے چھ ماہ کے دوران ماحولیاتی نمونوں میں پولیو وائرس کی مثبت شرح 48.1 فیصد سے کم ہو کر 13.1 فیصد رہ گئی، جو انسداد پولیو مہم کی کامیابی کا اہم اشارہ ہے۔
جون 2026 کے دوران ملک بھر سے پولیو وائرس کی نگرانی کے لیے 127 ماحولیاتی نمونے حاصل کیے گئے، جن میں سے 117 نمونے منفی جبکہ صرف 10 نمونوں میں پولیو وائرس کی موجودگی کی تصدیق ہوئی۔
اعداد و شمار کے مطابق جنوری سے جون 2026 کے دوران مثبت ماحولیاتی نمونوں کی تعداد 369 سے کم ہو کر 100 رہ گئی، جو ملک بھر میں جاری انسداد پولیو اقدامات کے مؤثر نتائج کی عکاسی کرتی ہے۔
صوبائی سطح پر پنجاب سے حاصل کیے گئے تمام 31 ماحولیاتی نمونے منفی قرار پائے۔ اسی طرح سندھ کے 29 میں سے 28، خیبرپختونخوا کے 34 میں سے 30 اور بلوچستان کے 23 میں سے 18 نمونے بھی پولیو وائرس سے پاک پائے گئے۔
نیشنل ای او سی کے مطابق سال 2026 کے دوران اب تک ملک میں پولیو کے صرف 3 کیسز کی تصدیق ہوئی ہے، جبکہ وائرس کے مکمل خاتمے کے لیے نگرانی کے نظام کو مزید مضبوط بنانے اور انسداد پولیو مہم کو بھرپور انداز میں جاری رکھنے کا عمل مسلسل جاری ہے۔
Web Desk
Media Channel
شائع ہوا: 25 جولائی، 2026 کو 04:52 AM
آخری تدوین: 25 جولائی، 2026
