گورنر شپ نہ ملنے پر ایک سیاسی جماعت کے سربراہ ناراض ہیں: محسن نقوی

لاہور: وفاقی وزیر داخلہ محسن نقوی نے دعویٰ کیا ہے کہ گورنر راج میں حصہ اور گورنر شپ نہ ملنے پر ایک سیاسی جماعت کے سربراہ شدید ناراض ہیں۔ انہوں نے کہا کہ ماضی میں کئی دہائیوں تک اسٹیبلشمنٹ کے سہارے سیاست کرنے والے رہنماؤں کو دوسروں پر انگلیاں اٹھانے کے بجائے حقائق کی بنیاد پر بات کرنی چاہیے۔

لاہور میں صحافیوں سے غیر رسمی گفتگو کرتے ہوئے محسن نقوی نے کہا کہ یہ وہی سیاستدان ہیں جو اپنی سیاسی جماعت کے ہوائی ٹکٹ بھی اسٹیبلشمنٹ سے بنواتے تھے۔ ان کے مطابق سیاسی اختلافات اپنی جگہ، تاہم غیر شائستہ زبان اور الزام تراشی کے بجائے دلیل اور حقائق سے بات کرنا ضروری ہے۔

وفاقی وزیر داخلہ نے سابق فاٹا کے اضلاع کے وسائل کے معاملے پر بعض سیاسی رہنماؤں کے مؤقف پر بھی سوال اٹھایا۔ انہوں نے کہا کہ اگر ان اضلاع کو کئی سال تک ان کا جائز حصہ نہیں مل رہا تھا تو اس وقت متعلقہ رہنما خاموش کیوں رہے؟ ان کے بقول سابق فاٹا کے عوام کے حقوق کا معاملہ سیاسی مفادات سے بالاتر ہو کر دیکھا جانا چاہیے۔

محسن نقوی نے کہا کہ خیبرپختونخوا اس وقت سنگین سیکیورٹی چیلنجز سے دوچار ہے اور سیاسی رہنماؤں کو انتشار پھیلانے کے بجائے امن و امان کی بحالی اور دہشت گردی کے خاتمے کے لیے اپنا کردار ادا کرنا چاہیے۔

انہوں نے زور دیا کہ صوبے کو اس وقت سیاسی محاذ آرائی کے بجائے امن، استحکام اور مشترکہ کوششوں کی ضرورت ہے۔