پیٹرولیم مصنوعات کی قیمتوں کا نیا یومیہ نظام نافذ، اوگرا روزانہ نئی قیمتیں جاری کرے گا

اسلام آباد: حکومت نے پیٹرولیم مصنوعات کی قیمتوں کے تعین کا نیا یومیہ نظام منظور کر لیا ہے، جس کے تحت آج سے پیٹرول اور ڈیزل کی قیمتیں روزانہ کی بنیاد پر مقرر کی جائیں گی۔

دستاویز کے مطابق آئل اینڈ گیس ریگولیٹری اتھارٹی (اوگرا) روزانہ نئی ایکس ڈپو قیمتیں اپنی ویب سائٹ پر جاری کرے گی، جبکہ ہفتہ اور اتوار کو پیٹرولیم مصنوعات کی قیمتوں میں کوئی تبدیلی نہیں کی جائے گی۔

نئے نظام کے تحت پیٹرول اور ہائی اسپیڈ ڈیزل کی قیمتیں عالمی مارکیٹ میں گزشتہ سات روز کی اوسط قیمتوں سے منسلک ہوں گی۔ پیٹرول کی قیمت درآمدی لاگت اور پریمیم کی بنیاد پر روزانہ طے کی جائے گی، جبکہ درآمد نہ ہونے کی صورت میں سالانہ اوسط پریمیم کے مطابق قیمت مقرر ہوگی۔ اسی طرح ہائی اسپیڈ ڈیزل کی قیمت بھی درآمدی لاگت اور سات روزہ اوسط عالمی نرخوں کے مطابق مقرر کی جائے گی۔

دستاویز میں کہا گیا ہے کہ اوگرا کو روزانہ قیمتوں کے تعین کے لیے حکومتی منظوری کی ضرورت نہیں ہوگی، تاہم پیٹرولیم ڈیولپمنٹ لیوی کابینہ کی مقرر کردہ حد سے زیادہ عائد نہیں کی جا سکے گی، جبکہ لیوی میں کسی بھی تبدیلی کے لیے وزارتِ خزانہ کی منظوری لازمی ہوگی۔

شفافیت کو یقینی بنانے کے لیے اوگرا روزانہ عالمی ریفرنس قیمتیں بھی اپنی ویب سائٹ پر جاری کرے گا تاکہ صارفین قیمتوں کے تعین کے طریقہ کار سے آگاہ رہ سکیں۔

نئے ضابطوں کے مطابق 2027 سے ہائی اسپیڈ ڈیزل کی درآمد صرف پاکستان اسٹیٹ آئل (پی ایس او) کرے گی، جبکہ آئل مارکیٹنگ کمپنیاں (او ایم سیز) اپنے مارکیٹ شیئر کے مطابق پیٹرول درآمد کر سکیں گی۔

دستاویز میں مزید کہا گیا ہے کہ درآمدی شرائط کی خلاف ورزی کرنے والی او ایم سیز کو نو ماہ تک نااہل قرار دیا جا سکے گا۔ اس کے علاوہ مٹی کے تیل اور لائٹ ڈیزل آئل کی قیمتیں بھی روزانہ کی بنیاد پر مقرر کی جائیں گی۔

حکومت نے اوگرا کو نئے قیمتوں کے نظام پر فوری عملدرآمد کی ہدایت جاری کر دی ہے۔