غیر فعال سموں سے منسلک واٹس ایپ اکاؤنٹس بند کرنے کا پی ٹی اے کا اعلان

اسلام آباد: پاکستان ٹیلی کمیونیکیشن اتھارٹی (پی ٹی اے) نے غیر فعال، منسوخ یا زیرِ استعمال نہ رہنے والی موبائل سموں سے منسلک واٹس ایپ اکاؤنٹس کو بلاک کرنے کا اعلان کر دیا ہے۔

پی ٹی اے کے مطابق بعض غیر فعال موبائل نمبرز سے منسلک واٹس ایپ اکاؤنٹس کو فراڈ اور دیگر غیر قانونی سرگرمیوں کے لیے استعمال کیے جانے کی اطلاعات سامنے آئی ہیں، جس کے باعث ایسے اکاؤنٹس کے خلاف کارروائی کا فیصلہ کیا گیا ہے۔

اتھارٹی نے واضح کیا ہے کہ غیر فعال سموں سے منسلک واٹس ایپ اکاؤنٹس کو بلاک کرنے کا عمل کسی بھی وقت شروع کیا جا سکتا ہے۔ پی ٹی اے کی جانب سے اس فیصلے سے قبل صارفین میں آگاہی کے لیے کئی ہفتوں تک مہم بھی چلائی گئی۔

آگاہی مہم کے دوران صارفین کو ہدایت کی گئی کہ وہ اپنے واٹس ایپ اکاؤنٹس کے ساتھ منسلک موبائل سموں کی حیثیت چیک کریں اور انہیں فعال و رجسٹرڈ رکھیں۔ اس مقصد کے لیے موبائل فون سے کال ملانے کے دوران کالنگ ٹون کی جگہ بھی صارفین کو غیر فعال سموں سے منسلک واٹس ایپ اکاؤنٹس بند ہونے کے حوالے سے پیغام سنایا جاتا رہا۔

پی ٹی اے نے صارفین پر زور دیا ہے کہ وہ اپنے واٹس ایپ اکاؤنٹس کو ایسے موبائل نمبرز کے ساتھ منسلک رکھیں جو فعال اور ان کے زیرِ استعمال ہوں۔

اتھارٹی کے مطابق وہ صارفین جنہوں نے اپنا موبائل نمبر تبدیل کر لیا ہے، انہیں واٹس ایپ میں موجود ’Change Number‘ آپشن بروقت استعمال کرنا چاہیے تاکہ نئے نمبر پر اکاؤنٹ منتقل کیا جا سکے اور اکاؤنٹ پر صارف کا کنٹرول برقرار رہے۔

پی ٹی اے نے صارفین کو یہ بھی مشورہ دیا ہے کہ وہ اپنی موبائل سموں کی موجودہ حیثیت کی تصدیق کریں اور اگر کوئی نمبر غیر فعال یا منسوخ ہو چکا ہے تو بروقت ضروری اقدامات کریں۔

پی ٹی اے کا کہنا ہے کہ اس اقدام کا بنیادی مقصد غیر فعال نمبرز کے غلط استعمال، فراڈ اور دیگر غیر قانونی سرگرمیوں کی روک تھام کے ساتھ ساتھ صارفین کی ڈیجیٹل سکیورٹی کو بہتر بنانا ہے۔

### بیرونِ ملک پاکستانی بھی متاثر ہو سکتے ہیں

اس فیصلے سے بیرونِ ملک مقیم وہ پاکستانی بھی متاثر ہو سکتے ہیں جو پاکستانی موبائل سم پر بنائے گئے واٹس ایپ اکاؤنٹس استعمال کر رہے ہیں لیکن متعلقہ ملک منتقل ہونے کے بعد اپنا واٹس ایپ اکاؤنٹ مقامی اور فعال موبائل نمبر پر منتقل نہیں کر سکے۔

صارفین کو ہدایت کی گئی ہے کہ وہ کسی ممکنہ رکاوٹ سے بچنے کے لیے اپنے واٹس ایپ اکاؤنٹ سے منسلک موبائل نمبر کی فعال حیثیت یقینی بنائیں اور ضرورت پڑنے پر ’Change Number‘ کا آپشن استعمال کریں۔