سفیر پاکستان رضوان سعید شیخ کا نیوز ویک میں مضمون، سندھ طاس معاہدے پر بھارتی الزامات مسترد

واشنگٹن: سفیر پاکستان رضوان سعید شیخ نے امریکی جریدے نیوز ویک میں شائع ہونے والے اپنے مضمون میں سندھ طاس معاہدے سے متعلق بھارتی سفیر کے مؤقف اور الزامات کو یکسر مسترد کر دیا ہے۔

رضوان سعید شیخ نے کہا کہ بھارت مسلسل سندھ طاس معاہدے کی ساخت، تاریخ، مقصد اور افادیت کو مسخ کرنے کی کوشش کر رہا ہے، تاہم معاہدے کی قانونی حیثیت واضح ہے۔

پاکستانی سفیر کے مطابق سندھ طاس معاہدہ ایک بین الاقوامی معاہدہ ہے جس کی پاسداری دونوں فریقوں پر لازم ہے۔ انہوں نے واضح کیا کہ معاہدے میں یکطرفہ طور پر معطلی کی کوئی گنجائش نہیں اور کوئی بھی ریاست کسی عالمی معاہدے کے تحت اپنی ذمہ داریوں سے یکطرفہ طور پر دستبردار نہیں ہو سکتی۔

رضوان سعید شیخ نے کہا کہ سندھ طاس معاہدہ بدستور مؤثر، نافذ العمل اور قانونی طور پر دونوں فریقوں پر لاگو ہے۔ پاکستان معاہدے کی روح کے مطابق اس پر مکمل عمل درآمد کے لیے پرعزم ہے۔

انہوں نے مزید کہا کہ سندھ طاس معاہدے کے حوالے سے بھارت کے یکطرفہ اقدامات جنوبی ایشیا میں امن و سلامتی کے لیے سنگین خطرہ ہیں۔

پاکستانی سفیر نے بھارت پر زور دیا کہ وہ سندھ طاس معاہدے سے متعلق اپنے یکطرفہ اقدامات واپس لے اور بین الاقوامی قوانین اور معاہدے کی مکمل پاسداری کرے۔