پاک امریکا اقتصادی شراکت داری دیرپا تعلقات کی ضامن ہوگی، سفیر رضوان سعید شیخ

(واشنگٹن) امریکا میں پاکستان کے سفیر رضوان سعید شیخ نے کہا ہے کہ پاک امریکا اقتصادی شراکت داری دونوں ممالک کے درمیان دیرپا تعلقات، سرمایہ کاری کے فروغ اور مشترکہ ترقی کی ضامن ثابت ہوگی۔

واشنگٹن میں پاکستانی سفیر رضوان سعید شیخ نے امریکی بین الاقوامی ترقیاتی مالیاتی کارپوریشن (ڈی ایف سی) کے چیف ایگزیکٹو آفیسر بینجمن بلیک سے ملاقات کی، جس میں دوطرفہ اقتصادی تعاون، سرمایہ کاری کے مواقع اور مختلف ترقیاتی منصوبوں پر تفصیلی تبادلہ خیال کیا گیا۔

ملاقات کے دوران سفیر پاکستان نے ڈی ایف سی کی جانب سے پاکستان میں توانائی، انفراسٹرکچر، معدنیات، آئی ٹی اور بندرگاہوں سمیت اہم شعبوں میں سرمایہ کاری میں دلچسپی کا خیرمقدم کیا۔ دونوں فریقین نے جاری منصوبوں پر پیش رفت کا جائزہ لیا اور مستقبل میں تعاون کے لیے ترجیحی شعبوں کی نشاندہی بھی کی۔

اس موقع پر رضوان سعید شیخ نے ڈی ایف سی کے چیف ایگزیکٹو بینجمن بلیک کو فیفا ورلڈ کپ کے لیے پاکستان میں تیار کیا جانے والا آفیشل فٹ بال "ٹرائیونڈا" بطور تحفہ پیش کیا۔ انہوں نے کہا کہ عالمی سطح پر پاکستانی ساختہ فٹ بال کا مسلسل انتخاب ملک کی صنعتی مہارت اور معیار کا اعتراف ہے، جو پوری قوم کے لیے باعث فخر ہے۔

ڈی ایف سی کے چیف ایگزیکٹو بینجمن بلیک نے "ٹرائیونڈا" فٹ بال کے اعلیٰ معیار کو سراہتے ہوئے پاکستان کے صنعتی شعبے کی صلاحیتوں کی تعریف کی اور مختلف شعبوں میں تعاون کے مزید امکانات پر اطمینان کا اظہار کیا۔

ملاقات کے اختتام پر دونوں فریقین نے پاکستان کی سماجی و معاشی ترقی، بنیادی ڈھانچے کی بہتری اور سرمایہ کاری کے فروغ کے لیے باہمی شراکت داری کو مزید مستحکم بنانے کے عزم کا اعادہ کیا۔

سفیر رضوان سعید شیخ نے اس موقع پر کہا کہ پاک امریکا اقتصادی شراکت داری نہ صرف دونوں ممالک کے درمیان اقتصادی تعاون کو نئی جہت دے گی بلکہ دیرپا اور مضبوط تعلقات کے فروغ میں بھی اہم کردار ادا کرے گی۔