طلبہ کا احتجاج پرامن تھا، تشدد افسوسناک ہے: سلمان خان کا سخت ردعمل

ممبئی: بالی ووڈ کے معروف اداکار سلمان خان نے بھارتی تعلیمی نظام میں مبینہ پیپر لیک کے خلاف احتجاج کرنے والے طلبہ کی حمایت کرتے ہوئے کہا ہے کہ ان کا احتجاج پرامن تھا، تاہم اس پر تشدد ہونا انتہائی افسوسناک ہے۔

اپنے بیان میں سلمان خان نے کہا کہ احتجاج کے دوران زخمی ہونے والے طلبہ اور ان کے اہلِ خانہ کے ساتھ ان کی دلی ہمدردی ہے۔ انہوں نے کہا کہ پیپر لیک ایک نہایت سنگین مسئلہ ہے اور یہ خوش آئند بات ہے کہ ملک بھر کے طلبہ بہتر تعلیمی نظام کے لیے متحد ہوئے، جبکہ والدین نے بھی ان کا بھرپور ساتھ دیا۔

اداکار نے طلبہ کے عزم، خلوص اور تعلیم کے لیے جذبے کو سراہتے ہوئے کہا کہ موجودہ نسل اپنی محنت اور قابلیت کے ذریعے بھارت کا نام روشن کرے گی۔ ان کے مطابق طلبہ نے جمہوری انداز میں اپنا مؤقف پیش کیا، جو قابلِ تعریف ہے۔

سلمان خان نے زور دیا کہ یہ معاملہ طلبہ اور تعلیمی نظام سے متعلق ہے، اسے سیاسی رنگ نہیں دیا جانا چاہیے، جبکہ اس جدوجہد کا اصل کریڈٹ بھی صرف طلبہ کو ہی ملنا چاہیے۔

انہوں نے امید ظاہر کی کہ حکومت طلبہ کی آواز سنے گی، ان کے مطالبات پر سنجیدگی سے غور کرے گی اور تعلیمی نظام کو مزید مضبوط اور شفاف بنانے کے لیے مؤثر اقدامات کرے گی۔

اپنے پیغام کے اختتام پر سلمان خان نے کہا کہ تعلیم کو معاشرے کا سب سے بڑا رجحان اور فخر بننا چاہیے تاکہ دنیا بھر سے طلبہ بھارت میں تعلیم حاصل کرنے آئیں اور ملک ایک عالمی تعلیمی مرکز کے طور پر ابھرے۔