سعودی عرب کی کویت، بحرین اور اردن پر مبینہ ایرانی حملوں کی شدید مذمت

ریاض: سعودی عرب نے کویت، بحرین اور اردن پر مبینہ ایرانی حملوں کی شدید مذمت کرتے ہوئے متاثرہ ممالک کے ساتھ مکمل یکجہتی اور حمایت کا اظہار کیا ہے۔

سعودی وزارت خارجہ کی جانب سے جاری بیان میں کہا گیا ہے کہ مملکت کویت، بحرین اور اردن کے خلاف ہونے والے حملوں کی سخت الفاظ میں مذمت کرتی ہے اور ان ممالک کی سلامتی، استحکام اور خودمختاری کے تحفظ کے لیے کیے جانے والے اقدامات کی مکمل حمایت کرتی ہے۔

بیان کے مطابق ایسے حملے بین الاقوامی قانون، اقوام متحدہ کے چارٹر اور اچھے ہمسائیگی کے اصولوں کی کھلی خلاف ورزی ہیں، جو خطے کے امن و استحکام کے لیے خطرہ بن سکتے ہیں۔

سعودی وزارت خارجہ نے عالمی برادری پر زور دیا کہ وہ خطے میں کشیدگی کم کرنے اور امن و استحکام برقرار رکھنے کے لیے مؤثر کردار ادا کرے۔

دریں اثنا، خلیج تعاون کونسل (جی سی سی) کے سیکریٹری جنرل جاسم البدیوی نے بھی بحرین، کویت اور اردن پر مبینہ ایرانی حملوں کی مذمت کرتے ہوئے انہیں بین الاقوامی قوانین کی سنگین خلاف ورزی قرار دیا ہے۔

ایران کی جانب سے ان بیانات پر تاحال کوئی باضابطہ ردعمل سامنے نہیں آیا۔