بلوچستان میں سکیورٹی فورسز کے کامیاب آپریشنز، 10 دہشت گرد ہلاک، 2 خاتون خودکش حملہ آور گرفتار

راولپنڈی: بلوچستان میں سکیورٹی فورسز نے انٹیلی جنس اطلاعات کی بنیاد پر مختلف علاقوں میں مشترکہ کارروائیاں کرتے ہوئے 10 دہشت گردوں کو ہلاک کر دیا، جبکہ 2 خاتون خودکش حملہ آوروں اور ان کے ایک مبینہ سہولت کار کو گرفتار کر لیا۔

پاک فوج کے شعبہ تعلقات عامہ (آئی ایس پی آر) کے جاری کردہ بیان کے مطابق سکیورٹی فورسز نے گزشتہ 48 گھنٹوں کے دوران ضلع سوراب اور مستونگ میں متعدد انٹیلی جنس بیسڈ، ایریا سینیٹائزیشن اور ٹارگٹڈ آپریشنز کیے۔

آئی ایس پی آر کے مطابق ضلع سوراب میں دہشت گردوں کے ٹھکانوں کو مؤثر انداز میں نشانہ بنایا گیا، جہاں کارروائی کے دوران 7 دہشت گرد ہلاک ہوئے۔

بیان میں کہا گیا کہ ضلع مستونگ میں ایک اور آپریشن کے دوران 3 دہشت گرد مارے گئے، جبکہ دو خواتین، جنہیں خودکش حملہ آور قرار دیا گیا، اور ان کے ایک مبینہ سہولت کار کو گرفتار کر لیا گیا۔

فوج کے مطابق کارروائیوں کے دوران دہشت گردوں کے قبضے سے بھاری مقدار میں اسلحہ، گولہ بارود اور دیسی ساختہ دھماکا خیز مواد (آئی ای ڈیز) بھی برآمد کیا گیا۔

آئی ایس پی آر نے مزید بتایا کہ علاقے میں دہشت گردوں کی ممکنہ موجودگی کے خاتمے کے لیے سینیٹائزیشن آپریشن تاحال جاری ہے اور سکیورٹی فورسز دہشت گردی کے خاتمے کے لیے اپنی کارروائیاں بلا تعطل جاری رکھے ہوئے ہیں۔