خیبرپختونخوا میں سیکیورٹی فورسز کی مختلف کارروائیاں، 21 خوارج ہلاک

پشاور: سیکیورٹی فورسز نے خیبرپختونخوا میں دہشتگردوں کے خلاف مختلف کارروائیوں کے دوران 21 خوارج کو ہلاک کردیا۔ آئی ایس پی آر کے مطابق کارروائیوں کے دوران دہشتگردوں کی پاکستان میں دراندازی کی کوشش بھی ناکام بنادی گئی۔

پاک فوج کے شعبہ تعلقات عامہ (آئی ایس پی آر) کے مطابق سیکیورٹی فورسز نے 3 سے 5 ستمبر کے دوران خیبرپختونخوا کے مختلف علاقوں میں انٹیلی جنس بنیادوں پر کارروائیاں کیں، جن میں بھارتی حمایت یافتہ فتنہ الخوارج کے 21 دہشتگرد مارے گئے۔

آئی ایس پی آر کے مطابق اس سے قبل 31 اگست اور یکم ستمبر کی درمیانی شب شمالی وزیرستان میں پاک افغان سرحد کے قریب سیکیورٹی فورسز نے کارروائی کی تھی۔ کارروائی کے دوران علاقے میں چھپے مزید 10 خوارج ہلاک کیے گئے۔

ترجمان کے مطابق مؤثر کارروائیوں کے نتیجے میں پاکستان میں دراندازی کی کوشش کرنے والے دہشتگردوں کو ناکام بنادیا گیا، جس کے بعد ہلاک ہونے والے دہشتگردوں کی مجموعی تعداد 25 ہوگئی۔

محسن نقوی کا سیکیورٹی فورسز کو خراج تحسین

وفاقی وزیر داخلہ محسن نقوی نے خیبرپختونخوا میں بھارتی اسپانسرڈ دہشتگردوں کے خلاف کامیاب کارروائیوں پر سیکیورٹی فورسز کو خراج تحسین پیش کیا۔

محسن نقوی کا کہنا تھا کہ خیبرپختونخوا میں کامیاب کارروائیوں کے دوران 21 دہشتگردوں کی ہلاکت سیکیورٹی فورسز کی بڑی کامیابی ہے۔ انہوں نے دہشتگردوں کے مذموم عزائم ناکام بنانے پر سیکیورٹی فورسز کی پیشہ ورانہ صلاحیتوں کو سراہا۔

وفاقی وزیر داخلہ نے کہا کہ سیکیورٹی فورسز بھارتی اسپانسرڈ دہشتگردوں کے مکمل خاتمے کے لیے پرعزم ہیں۔ انہوں نے کہا کہ سیکیورٹی فورسز کے بہادر سپوت قوم کا فخر ہیں اور پوری قوم دہشتگردی کے خلاف جنگ میں سیکیورٹی فورسز کے ساتھ کھڑی ہے۔

سیکیورٹی فورسز کی جانب سے خیبرپختونخوا میں دہشتگردوں کے خلاف کارروائیاں جاری ہیں، جبکہ حکام کا کہنا ہے کہ ملک میں امن و استحکام کے لیے دہشتگرد عناصر کے خلاف مؤثر کارروائیاں جاری رکھی جائیں گی۔