بھارتی گلوکار بادشاہ اور اداکارہ ایشا رِکھی میں شادی کے 5 ماہ بعد علیحدگی

بھارتی میڈیا کے مطابق دونوں نے پیر کی رات اپنی اپنی انسٹاگرام اسٹوریز پر مشترکہ بیان جاری کرتے ہوئے علیحدگی کا اعلان کیا۔ دونوں نے مارچ میں ایک نجی تقریب کے دوران شادی کی تھی۔

بادشاہ نے بیان میں کہا کہ انہوں نے اور ایشا نے باہمی رضامندی اور احترام کے ساتھ اپنی راہیں جدا کرنے اور اپنی اپنی زندگی میں آگے بڑھنے کا فیصلہ کیا ہے۔ انہوں نے مداحوں اور عوام سے درخواست کی کہ اس دوران ان کی نجی زندگی کا احترام کیا جائے۔

گلوکار نے واضح کیا کہ یہ اس معاملے پر ان کا واحد بیان ہے اور لوگوں سے مزید قیاس آرائیوں یا مفروضوں سے گریز کرنے کی اپیل کی۔

واضح رہے کہ دونوں کے تعلقات میں اختلافات کی خبریں جولائی میں سوشل میڈیا پر گردش کرنا شروع ہوئی تھیں۔ ایشا کی جانب سے ایک جذباتی پوسٹ کے بعد مداحوں نے ان کے رشتے میں مشکلات کے حوالے سے قیاس آرائیاں کی تھیں۔

بادشاہ اس سے قبل جاسمین مسیح سے شادی کرچکے ہیں، تاہم دونوں کی 2020 میں طلاق ہوگئی تھی۔ اس شادی سے ان کی ایک بیٹی بھی ہے۔