وزیراعظم شہباز شریف اور فیلڈ مارشل عاصم منیر نے پاکستان کے سب سے بڑے ڈیٹا سینٹر "اسکائی 47 قراقرم ون" کا افتتاح کر دیا

اسلام آباد: وزیراعظم شہباز شریف اور فیلڈ مارشل سید عاصم منیر نے پاکستان کے سب سے بڑے ڈیٹا سینٹر "اسکائی 47 قراقرم ون" کا افتتاح کر دیا۔ افتتاحی تقریب کے دوران انہیں منصوبے کی مختلف تکنیکی خصوصیات اور صلاحیتوں کے حوالے سے تفصیلی بریفنگ بھی دی گئی۔

بریفنگ میں بتایا گیا کہ اسکائی 47 قراقرم ون کلاوڈ کمپیوٹنگ، ڈیٹا ہوسٹنگ اور ڈیجیٹل خدمات کے لیے ایک مضبوط اور جدید انفراسٹرکچر فراہم کرے گا۔ حکام کے مطابق یہ منصوبہ پاکستان کو ٹیکنالوجی کے میدان میں خود انحصاری کی جانب لے جانے والا اہم سنگ میل ثابت ہوگا۔

مزید بتایا گیا کہ یہ جدید ڈیٹا سینٹر مصنوعی ذہانت (AI)، مشین لرننگ (Machine Learning) اور ہائی پرفارمنس کمپیوٹنگ (HPC) کے تقاضوں کو پورا کرنے کی مکمل صلاحیت رکھتا ہے، جبکہ حساس قومی اور تجارتی معلومات کو محفوظ رکھنے میں بھی اہم کردار ادا کرے گا۔

افتتاحی تقریب سے خطاب کرتے ہوئے وزیراعظم شہباز شریف نے کہا کہ جدید ترین ڈیٹا سینٹر انتہائی متاثر کن اور قابل تحسین منصوبہ ہے، جو مختصر مدت میں غیر معمولی عزم، اعلیٰ مہارت اور پیشہ ورانہ صلاحیت کے ساتھ مکمل کیا گیا۔

انہوں نے فیلڈ مارشل سید عاصم منیر کی قیادت اور منصوبے کے شراکت دار زیڈ ٹی ای (ZTE) کی خدمات کو سراہتے ہوئے کہا کہ ایسے منصوبے پاکستان کے ڈیجیٹل مستقبل کی ضمانت ہیں۔ وزیراعظم کا کہنا تھا کہ قوم اگر اتحاد، محنت اور عزم کے ساتھ آگے بڑھے تو کوئی بھی ہدف حاصل کرنا ناممکن نہیں۔

وزیراعظم نے مزید کہا کہ اسکائی 47 ملک کی سائبر سیکیورٹی اور ڈیجیٹل خودمختاری کو مزید مضبوط بنائے گا اور پاکستان کو جدید ٹیکنالوجی کے شعبے میں نئی بلندیوں تک پہنچانے میں اہم کردار ادا کرے گا۔

تقریب سے خطاب کرتے ہوئے وفاقی وزیر برائے آئی ٹی شزا فاطمہ نے کہا کہ اسکائی 47 ڈیٹا سینٹر کا افتتاح پاکستان میں مصنوعی ذہانت کے نئے دور کا آغاز ہے۔ ان کا کہنا تھا کہ اس منصوبے سے ملک میں ڈیجیٹل معیشت کو فروغ ملے گا، مقامی افرادی قوت کی صلاحیتوں سے بہتر انداز میں فائدہ اٹھایا جا سکے گا اور ڈیٹا پر مبنی معیشت کی بنیاد مزید مضبوط ہوگی۔