اسپین نے ارجنٹینا کو 0-1 سے ہرا کر دوسری بار ورلڈ کپ جیت لیا، میسی ناکام

نیویارک: فیفا ورلڈ کپ 2026 کے سنسنی خیز فائنل میں اسپین نے دفاعی چیمپئن ارجنٹینا کو اضافی وقت میں 0-1 سے شکست دے کر تاریخ میں دوسری مرتبہ عالمی چیمپئن بننے کا اعزاز حاصل کر لیا۔

میٹ لائف اسٹیڈیم، نیویارک میں کھیلے گئے فائنل کے پہلے ہاف میں اسپین نے کھیل پر مکمل گرفت برقرار رکھی اور ارجنٹینا کے گول پر متعدد خطرناک حملے کیے، تاہم کوئی ٹیم گول کرنے میں کامیاب نہ ہو سکی۔ اسپین کے مضبوط دفاع نے ارجنٹینا کو پہلے ہاف میں گول کی جانب ایک بھی شاٹ لگانے کا موقع نہیں دیا۔

دوسرے ہاف میں بھی اسپین کی برتری برقرار رہی۔ مقررہ وقت ختم ہونے سے کچھ دیر قبل ارجنٹینا کے اینزو فرنانڈیز کو فاؤل کے باعث ریفری نے ریڈ کارڈ دکھا کر میدان سے باہر بھیج دیا، جس کے بعد ارجنٹینا نے بقیہ وقت دس کھلاڑیوں کے ساتھ کھیلا۔ اس دوران بھی ارجنٹینا گول کی جانب ایک بھی شاٹ نہ لگا سکی اور مقابلہ بغیر کسی گول کے اضافی وقت میں داخل ہوگیا۔

اضافی وقت کے پہلے حصے میں دونوں ٹیمیں گول کرنے میں ناکام رہیں، تاہم دوسرے اضافی ہاف کے آغاز میں اسپین کے اسٹار فارورڈ فیرن ٹوریس نے شاندار گول کر کے اپنی ٹیم کو فیصلہ کن برتری دلائی۔ خسارے میں جانے کے بعد لیونل میسی کی قیادت میں ارجنٹینا نے واپسی کی بھرپور کوشش کی، مگر اسپین کا دفاع دیوار ثابت ہوا اور میچ 0-1 سے اسپین کے حق میں ختم ہوا۔

اس تاریخی فتح کے ساتھ اسپین نے 16 برس بعد دوسری مرتبہ فیفا ورلڈ کپ جیت لیا، جبکہ دفاعی چیمپئن ارجنٹینا اپنا اعزاز برقرار رکھنے میں ناکام رہی۔

میچ کے اختتام پر امریکی صدر ڈونلڈ ٹرمپ نے اسپین کے کپتان کو ورلڈ کپ ٹرافی پیش کی اور فاتح ٹیم کے کھلاڑیوں میں ایوارڈز تقسیم کیے۔

انفرادی اعزازات

اسپین کے روڈری کو ٹورنامنٹ کا بہترین کھلاڑی قرار دیتے ہوئے گولڈن بال ایوارڈ دیا گیا۔

ارجنٹینا کے کپتان لیونل میسی نے سلور بال اپنے نام کی۔

اسپین کے نوجوان دفاعی کھلاڑی پال کوبارسی کو ینگ پلیئر آف دی ٹورنامنٹ قرار دیا گیا۔

اسپین کے گول کیپر اُنائی سائمن نے بہترین گول کیپر کا ایوارڈ حاصل کیا۔

فرانس کے اسٹار فارورڈ کائلین ایمباپے نے 10 گول کے ساتھ گولڈن بوٹ جیت کر یہ اعزاز دو مرتبہ حاصل کرنے والے پہلے فٹبالر بننے کا ریکارڈ قائم کیا، جبکہ میسی نے ٹورنامنٹ میں 8 گول اسکور کیے۔

اسپین کا تاریخی اعزاز

اس فتح کے بعد اسپین بیک وقت مردوں اور خواتین کا فیفا ورلڈ کپ جیتنے والا دنیا کا پہلا ملک بن گیا۔ اسپین نے 2023 میں ویمنز فیفا ورلڈ کپ بھی اپنے نام کیا تھا۔

ریکارڈز کی بارش

اسپین نے پورے ٹورنامنٹ میں صرف ایک گول کھا کر ورلڈ کپ جیتنے والی پہلی ٹیم ہونے کا اعزاز حاصل کیا۔

آٹھ میچوں میں کوئی بھی ٹیم اسپین کے خلاف برتری حاصل نہ کر سکی۔

ارجنٹینا ورلڈ کپ فائنل کی تاریخ میں 90 منٹ کے دوران گول پر ایک بھی شاٹ نہ لگانے والی پہلی ٹیم بن گئی۔

اسپین نے فائنل میں مجموعی طور پر 15 شاٹس لگائیں، جن میں سے 9 گول کی جانب تھیں، جبکہ ارجنٹینا پورے مقررہ وقت میں اسپین کے گول کیپر کو کسی بھی حقیقی آزمائش میں نہ ڈال سکی۔