اسپورٹس ڈپلومیسی اہم کردار ادا کرتی ہے، امریکی ناظم الامور نیٹلی اے بیکر

اسلام آباد میں ڈبلیو 15 ورلڈ ویمنز ٹینس چیمپئن شپ کی اختتامی تقریب سے خطاب کرتے ہوئے پاکستان میں امریکی ناظم الامور نیٹلی اے بیکر نے کہا ہے کہ کھیلوں کے ذریعے مختلف ممالک کے درمیان تعلقات اور باہمی روابط کو فروغ دینے میں اسپورٹس ڈپلومیسی اہم کردار ادا کرتی ہے۔

نیٹلی اے بیکر نے کہا کہ چیمپئن شپ میں شائقین کو بہترین ٹینس دیکھنے کو ملی۔ انہیں امید ہے کہ پاکستان آنے والی غیر ملکی کھلاڑیوں نے پاکستانی عوام کی مہمان نوازی اور یہاں کے ماحول سے بھرپور لطف اٹھایا ہوگا۔

امریکی ناظم الامور نے مزید کہا کہ وہ لاس اینجلس اولمپکس میں متعدد پاکستانی ایتھلیٹس کو ایکشن میں دیکھنے کے لیے پُرجوش ہیں۔ ان کا کہنا تھا کہ کھیل بین الاقوامی سطح پر لوگوں کو قریب لانے اور مختلف ممالک کے درمیان روابط مضبوط بنانے کا اہم ذریعہ ہیں۔