ترک صدر رجب طیب اردگان آج سعودی عرب پہنچیں گے، محمد بن سلمان اور شہباز شریف سے اہم ملاقاتیں متوقع

ریاض: ترکیہ کے صدر رجب طیب اردگان آج ایک روزہ سرکاری دورے پر سعودی عرب پہنچیں گے، جہاں وہ سعودی ولی عہد اور وزیراعظم شہزادہ محمد بن سلمان اور پاکستان کے وزیراعظم شہباز شریف سے اہم ملاقاتیں کریں گے۔

ترک صدارتی شعبۂ مواصلات کے سربراہ برہان الدین دوران نے سوشل میڈیا پلیٹ فارم پر جاری اپنے بیان میں بتایا کہ صدر اردگان کے دورے کے دوران باہمی دلچسپی کے امور، خطے کی موجودہ کشیدہ صورتحال، دوطرفہ تعلقات اور علاقائی و بین الاقوامی پیش رفت پر تبادلہ خیال کیا جائے گا۔

بیان کے مطابق سعودی ولی عہد محمد بن سلمان کے ساتھ ملاقات میں دونوں ممالک کے درمیان مختلف شعبوں میں تعاون، اقتصادی شراکت داری اور علاقائی استحکام سے متعلق امور زیر غور آئیں گے، جبکہ وزیراعظم شہباز شریف سے ملاقات میں پاکستان اور ترکیہ کے دیرینہ برادرانہ تعلقات، باہمی تعاون اور خطے کو درپیش چیلنجز پر گفتگو متوقع ہے۔

تاہم، ترک صدارتی شعبۂ مواصلات کی جانب سے ملاقاتوں کے ایجنڈے، ممکنہ معاہدوں یا کسی متوقع فیصلے کے حوالے سے فوری طور پر مزید تفصیلات جاری نہیں کی گئیں۔

صدر اردگان کا یہ دورہ ایسے وقت میں ہو رہا ہے جب مشرقِ وسطیٰ اور خطے کی مجموعی سیکیورٹی صورتحال عالمی توجہ کا مرکز بنی ہوئی ہے، جس کے باعث اس دورے اور اعلیٰ سطحی ملاقاتوں کو سفارتی لحاظ سے اہم قرار دیا جا رہا ہے۔