امریکا کو بھی پاکستان سے تعلقات کی ضرورت ہے، جیسے بھارت کیلئے ایران اہم ہے: مارکو روبیو

امریکی وزیر خارجہ مارکو روبیو نے کہا ہے کہ جس طرح بھارت کے لیے ایران کے ساتھ تعلقات ضروری ہیں، اسی طرح امریکا کے لیے بھی پاکستان کے ساتھ تعلقات برقرار رکھنا اہم ہے۔

بھارتی میڈیا کو انٹرویو دیتے ہوئے مارکو روبیو کا کہنا تھا کہ امریکا دنیا میں کہیں بھی ہونے والی دہشت گردی کے خلاف ہے اور ہر اس شخص یا ملک کی مخالفت کرتا ہے جو دہشت گردی کی سرپرستی کرتا ہے۔

امریکی وزیر خارجہ نے کہا کہ امریکا کے پاکستان کے ساتھ تعلقات ہیں اور جغرافیائی اعتبار سے بھی واشنگٹن کے لیے اسلام آباد کے ساتھ روابط برقرار رکھنا ضروری ہے۔

مارکو روبیو نے بھارت اور ایران کے تعلقات کی مثال دیتے ہوئے کہا کہ بھارتی حکومت کو ایران کے ساتھ تعلقات رکھنے اور ایرانی قیادت سے ملاقات کرنے کی ضرورت ہے، اسی طرح امریکا کو بھی پاکستان کے ساتھ تعلقات کی ضرورت ہے۔

انہوں نے مزید کہا کہ پاکستان کے ساتھ بات چیت امریکا کے لیے مددگار ثابت ہوسکتی ہے۔ ان کے مطابق ان تعلقات کے ذریعے امریکا بھارت کے خدشات دور کرنے میں بھی اپنا کردار ادا کرسکتا ہے۔