نیوزی لینڈ اور بھارت کے درمیان طویل کرکٹ سیریز کی ٹرافی کی رونمائی، پہلا ٹی ٹوئنٹی کل کھیلا جائے گا

نیوزی لینڈ اور بھارت کے درمیان تینوں فارمیٹس پر مشتمل طویل کرکٹ سیریز کی ٹرافی کی رونمائی کردی گئی۔ سیریز کا آغاز 22 اکتوبر سے پانچ ٹی ٹوئنٹی انٹرنیشنل میچز کے ساتھ ہوگا، جس میں دونوں ٹیمیں مجموعی طور پر 12 میچز کھیلیں گی۔

نیوزی لینڈ کرکٹ کے جاری کردہ شیڈول کے مطابق، دورے میں پانچ ٹی ٹوئنٹی، پانچ ون ڈے انٹرنیشنل اور دو ٹیسٹ میچز شامل ہیں۔ ٹی ٹوئنٹی سیریز یکم نومبر تک جاری رہے گی، جس کے بعد ون ڈے میچز کا آغاز ہوگا۔

پانچ میچز پر مشتمل ٹی ٹوئنٹی سیریز کے ابتدائی دو مقابلے کرائسٹ چرچ میں کھیلے جائیں گے، جبکہ بقیہ میچز ویلنگٹن، آکلینڈ اور ہیملٹن میں ہوں گے۔ ون ڈے سیریز کے ابتدائی تین میچز آکلینڈ، ویلنگٹن اور ہیملٹن میں شیڈول ہیں، جبکہ آخری دو میچز ماؤنٹ منگنوئی میں کھیلے جائیں گے۔

دورے کے آخری مرحلے میں دونوں ٹیمیں دو ٹیسٹ میچز میں مدمقابل ہوں گی۔ پہلا ٹیسٹ 19 سے 23 نومبر تک ویلنگٹن میں جبکہ دوسرا ٹیسٹ 27 نومبر سے یکم دسمبر تک کرائسٹ چرچ میں کھیلا جائے گا۔ طویل سیریز کا اختتام یکم دسمبر کو دوسرے ٹیسٹ میچ کے ساتھ ہوگا۔