ڈونلڈ ٹرمپ کا ایران سے جنگ کے جلد خاتمے کا اظہار، امریکی دفاعی پیداوار بڑھانے کا اعلان

واشنگٹن: امریکی صدر ڈونلڈ ٹرمپ نے ایران کے ساتھ جاری جنگ کے جلد خاتمے کی امید ظاہر کرتے ہوئے کہا ہے کہ انہیں یقین ہے ایران زیادہ عرصے تک اس جنگ کا بوجھ برداشت نہیں کر سکے گا۔

اوول آفس میں صحافیوں سے گفتگو کرتے ہوئے صدر ڈونلڈ ٹرمپ نے کہا کہ انہیں نہیں لگتا کہ ایران طویل عرصے تک موجودہ جنگ جاری رکھنے کی پوزیشن میں ہے، اسی لیے وہ اس تنازع کے جلد اختتام کے لیے پُرامید ہیں۔

صدر ٹرمپ نے اس موقع پر اعتراف کیا کہ امریکی فوج کو بعض اقسام کے ہتھیاروں کی دستیابی میں مشکلات کا سامنا ہے، تاہم انہوں نے واضح کیا کہ امریکہ کے پاس جدید اسلحے کے خاطر خواہ ذخائر موجود ہیں، اگرچہ کچھ مخصوص ہتھیاروں کی مقدار محدود ہے۔

انہوں نے کہا کہ امریکا اپنی دفاعی صلاحیتوں کو مزید مضبوط بنانے کے لیے دفاعی پیداوار میں اضافہ کر رہا ہے۔ اس سلسلے میں پیٹریاٹ اور ٹوماہاک میزائلوں سمیت مختلف جدید ہتھیاروں کی تیاری کے لیے نئے پیداواری پلانٹس قائم کیے جا رہے ہیں۔

امریکی صدر کے یہ بیانات ایسے وقت میں سامنے آئے ہیں جب خطے میں کشیدگی برقرار ہے اور ایران کے ساتھ جاری تنازع عالمی سطح پر توجہ کا مرکز بنا ہوا ہے۔