کیٹی زاکاریا وائٹ ہائوس کی نئی ترجمان مقرر

امریکی صدر ڈونلڈ ٹرمپ نے کئی ہفتوں کی قیاس آرائیوں کے بعد وائٹ ہاؤس کی نئی پریس سیکریٹری کے طور پر کیٹی زاکاریا کو نامزد کر دیا ہے، جو سابق ترجمان کیرولائن لیویٹ کی جگہ لیں گی

زاکاریا اس وقت ٹرمپ میڈیا اینڈ ٹیکنالوجی گروپ میں سینئر کمیونیکیشنز ایڈوائزر کے طور پر کام کر رہی ہیں۔ یہ وہی کمپنی ہے جو ٹرمپ کے سوشل میڈیا پلیٹ فارم ٹروتھ سوشل کو چلاتی ہے

ٹرمپ نے جمعے کو سوشل میڈیا پلیٹ فارم پر اعلان کرتے ہوئے زاکاریا کی تعریف کی اور کہا کہ وہ اپنے موجودہ عہدے پر بہترین کارکردگی دکھا چکی ہیں

زاکاریا نے بھی تقرری پر صدر کا شکریہ ادا کرتے ہوئے کہا کہ امریکی عوام تک انتظامیہ کی کارکردگی اور کامیابیوں کو پہنچانا ان کی ترجیحات میں شامل ہوگا۔ انہوں نے وائٹ ہاؤس کے صحافیوں اور ملک بھر کے رپورٹرز کے ساتھ کام کرنے کے عزم کا بھی اظہار کیا

میگا تحریک سے قریبی تعلق

زاکاریا صدر ٹرمپ کی سیاسی مہم میں بھی کام کر چکی ہیں۔ ٹرمپ کے مطابق انہوں نے اہم انتخابی ریاستوں میں ان کی مہم کے لیے خدمات انجام دیں۔ وہ فاکس نیوز اور نیوز میکس سمیت مختلف ٹی وی چینلز پر سیاسی تبصرے بھی کرتی رہی ہیں

زاکاریا اس سے قبل محکمہ ہوم لینڈ سکیورٹی کی ترجمان کے طور پر بھی مختصر عرصے کے لیے خدمات انجام دے چکی ہیں۔

ٹرمپ نے ان کی تقرری کا اعلان کرتے ہوئے انہیں اپنی سیاسی تحریک ’میک امریکا گریٹ اگین‘ (میگا) کی حامی قرار دیا اور توقع ظاہر کی کہ وہ بطور پریس سیکریٹری مؤثر کردار ادا کریں گی۔

کیرولائن لیویٹ کی جگہ لینا آسان نہیں ہوگا

زاکاریا سابق وائٹ ہاؤس پریس سیکریٹری کیرولائن لیویٹ کی جگہ سنبھالیں گی، جنہوں نے اگست میں عہدہ چھوڑ دیا تھا۔ لیویٹ نے اپنے بچوں کے ساتھ زیادہ وقت گزارنے کے لیے وائٹ ہاؤس سے علیحدگی اختیار کی تھی۔

لیویٹ کے جانے کے بعد انتظامیہ نے مستقل ترجمان کی عدم موجودگی میں مختلف اعلیٰ حکام کو صحافیوں کے سوالات کے جواب دینے کے لیے آگے کیا

کیٹی زاکاریا نے اپنی تقرری پر ردعمل دیتے ہوئے کہا کہ لیویٹ نے اپنے کام کے لیے ایک بلند معیار قائم کیا ہے اور وہ اس معیار پر پورا اترنے کی کوشش کریں گی

سابق وائٹ ہاؤس پریس سیکریٹری شان اسپائسر نے بھی زاکاریا کی حمایت کرتے ہوئے کہا کہ وہ میگا تحریک اور ’امریکا فرسٹ‘ پالیسیوں کی مؤثر حامی رہی ہیں اور انہیں صدر کا اعتماد حاصل ہے