ایران کے ہر حملے کے جواب میں پل یا بجلی گھر تباہ ہوگا، ٹرمپ کی نئی دھمکی

(واشنگٹن) امریکی صدر ڈونلڈ ٹرمپ نے ایران کو ایک بار پھر سخت انتباہ دیتے ہوئے کہا ہے کہ اگر آبنائے ہرمز میں بحری جہازوں پر حملے کیے گئے تو اس کا بھرپور جواب دیا جائے گا اور ایران کے اہم بنیادی ڈھانچے کو نشانہ بنایا جا سکتا ہے۔

صدر ٹرمپ نے اپنے بیان میں کہا کہ ایران کی جانب سے ہر حملے کے جواب میں ایک پل یا بجلی گھر تباہ کیا جائے گا۔ ان کے مطابق تہران یا اس کے نواح میں واقع پاور پلانٹس بھی ممکنہ اہداف میں شامل ہو سکتے ہیں۔

امریکی صدر کا کہنا تھا کہ آبنائے ہرمز عالمی تجارت اور توانائی کی ترسیل کے لیے انتہائی اہم گزرگاہ ہے، اس لیے وہاں بحری جہازوں پر کسی بھی حملے کو برداشت نہیں کیا جائے گا۔

انہوں نے مزید کہا کہ اگر ایران نے بین الاقوامی جہاز رانی کو نشانہ بنایا تو امریکا فیصلہ کن اور سخت کارروائی کرے گا، جس میں ایران کے اہم انفراسٹرکچر کو بھی ہدف بنایا جا سکتا ہے۔

صدر ٹرمپ کے اس بیان کے بعد خطے میں کشیدگی مزید بڑھنے کا خدشہ ظاہر کیا جا رہا ہے، جبکہ ایران کی جانب سے تاحال اس بیان پر کوئی باضابطہ ردعمل سامنے نہیں آیا۔