ٹرمپ نے ایران کے خلاف جنگ میں ایٹمی ہتھیار استعمال کرنے کا امکان مسترد کر دیا

واشنگٹن: امریکی صدر ڈونلڈ ٹرمپ نے ایران کے خلاف جاری جنگ میں فیصلہ کن کارروائی کے لیے ایٹمی ہتھیار استعمال کرنے کے امکان کو مسترد کر دیا ہے۔

اوول آفس میں ایک تقریب کے دوران ایک صحافی نے صدر ٹرمپ سے سوال کیا کہ کیا وہ ایران کے خلاف ایٹمی ہتھیار استعمال نہ کرنے کی یقین دہانی کرا سکتے ہیں؟ اس سوال پر امریکی صدر نے سخت ردعمل دیتے ہوئے اسے غیر ضروری قرار دیا۔

ٹرمپ نے کہا کہ وہ ایسا کبھی نہیں کہیں گے، تاہم واضح طور پر ایٹمی ہتھیاروں کے استعمال کے امکان کو مسترد کرتے ہیں کیونکہ اس کی کوئی ضرورت نہیں ہے۔

امریکی صدر کا کہنا تھا کہ ایران مکمل طور پر شکست کھا چکا ہے، ایسے میں اسے شکست دینے کے بعد ایٹمی ہتھیار استعمال کرنے کا سوال ہی پیدا نہیں ہوتا۔

ٹرمپ نے ایران پر انسانیت کے خلاف جرائم کے الزامات بھی عائد کرتے ہوئے کہا کہ ایران کے خلاف جنگی جرائم کا مقدمہ چلایا جانا چاہیے۔ انہوں نے دعویٰ کیا کہ ایران میں حکومت مخالف ایک لاکھ سے زائد افراد کو قتل کیا گیا۔

اس سے قبل صدر ٹرمپ نے اردن میں ایک فوجی اڈے پر حملوں کے جواب میں ایران کے خلاف سخت کارروائی کی دھمکی دی تھی۔

امریکی میڈیا کو دیے گئے ایک انٹرویو میں صدر ٹرمپ نے کہا تھا کہ اردن میں امریکی مفادات اور فوجی تنصیبات کو نشانہ بنائے جانے کی صورت میں امریکا کی جانب سے سخت ردعمل دیا جائے گا۔