ٹرمپ ایران کے خلاف وسیع فوجی آپریشن پر غور میں مصروف، درجنوں امریکی طیارے اسرائیل روانہ: رپورٹ

امریکی نیوز ویب سائٹ ایگزیوس نے دعویٰ کیا ہے کہ امریکی صدر ڈونلڈ ٹرمپ ایران کے خلاف ایک وسیع فوجی آپریشن شروع کرنے کے مختلف آپشنز پر غور کر رہے ہیں، جبکہ درجنوں امریکی فضائی ایندھن بردار (ری فیولنگ) طیارے اسرائیل بھیجے جا رہے ہیں۔

رپورٹ کے مطابق زیر غور منصوبوں میں ایران کے بجلی گھروں، اہم انفراسٹرکچر اور جوہری تنصیبات کو ممکنہ طور پر نشانہ بنانا شامل ہے۔ تاہم، رپورٹ کے مطابق صدر ٹرمپ نے تاحال کسی حتمی فوجی کارروائی کی منظوری نہیں دی۔

ایگزیوس کا کہنا ہے کہ امریکا کا مقصد ایران پر دباؤ بڑھا کر آبنائے ہرمز کو بحری آمدورفت کے لیے کھلوانا اور تہران کو اپنے جوہری پروگرام سے متعلق امریکی مطالبات تسلیم کرنے پر آمادہ کرنا ہے۔

رپورٹ میں یہ خدشہ بھی ظاہر کیا گیا ہے کہ آئندہ چند روز کے دوران مزید امریکی ری فیولنگ طیارے اسرائیل پہنچ سکتے ہیں، جس سے خطے میں کشیدگی مزید بڑھنے کا امکان ہے۔

دوسری جانب وائٹ ہاؤس کی ترجمان اینا کیلی نے الزام عائد کیا کہ ایران نے آبنائے ہرمز میں زیادہ تر شہری جہازوں کو نشانہ بنایا ہے اور ایسے پڑوسی ممالک پر بھی حملے کیے ہیں جن کا اس تنازع سے براہِ راست تعلق نہیں۔

انہوں نے کہا کہ صدر ڈونلڈ ٹرمپ نے امریکی سینٹرل کمانڈ (سینٹ کام) کو ہدایت دی ہے کہ ایران کی حملہ کرنے کی صلاحیت کو محدود کرنے کے لیے ضروری اقدامات کیے جائیں اور ایرانی حکومت کو اس کے اقدامات پر جوابدہ بنایا جائے۔

ادھر ایران کی سپاہ پاسداران انقلاب نے خبردار کیا ہے کہ جن ممالک میں امریکی فوجی اڈے موجود ہیں، وہ ممکنہ جوابی کارروائی کے لیے تیار رہیں۔ بیان میں کہا گیا کہ ایسے ممالک شہری دفاع کے اقدامات مؤثر بنائیں اور شہریوں کو ممکنہ فوجی اہداف سے دور رکھیں۔

سپاہ پاسداران انقلاب کا مزید کہنا تھا کہ امریکی فوجی اڈوں کی موجودگی والی سرزمین ایران کے خلاف استعمال ہو رہی ہے، اور خطے میں امن کی بحالی تک ایران اپنی جوابی کارروائیاں جاری رکھے گا۔