امریکا نے اپنے شہریوں کے لیے عالمی سفری الرٹ جاری کر دیا

واشنگٹن: امریکا نے دنیا بھر میں موجود اپنے شہریوں کے لیے عالمی سفری الرٹ جاری کرتے ہوئے انہیں ممکنہ سکیورٹی خطرات کے پیش نظر محتاط رہنے کی ہدایت کی ہے۔

امریکی محکمہ خارجہ کی جانب سے جاری بیان میں کہا گیا ہے کہ حالیہ علاقائی کشیدگی کے باعث امریکی سفارتی تنصیبات اور بیرونِ ملک امریکی مفادات کو خطرات لاحق ہو سکتے ہیں۔

بیان میں خبردار کیا گیا ہے کہ ایران کی حمایت یافتہ گروہ مختلف ممالک میں امریکی شہریوں، سفارتی مشنز اور دیگر امریکی مفادات کو نشانہ بنانے کی کوشش کر سکتے ہیں، اس لیے امریکی شہری مقامی سکیورٹی صورتحال پر نظر رکھیں اور حکام کی ہدایات پر عمل کریں۔

میڈیا رپورٹس کے مطابق سفری الرٹ میں کہا گیا ہے کہ موجودہ صورتحال انتہائی پیچیدہ ہے اور خطے میں کشیدگی کسی بھی وقت مزید بڑھ سکتی ہے، جس کے باعث سکیورٹی خطرات میں اچانک اضافہ ہونے کا امکان ہے۔

یہ سفری الرٹ ایسے وقت جاری کیا گیا ہے جب امریکا اور ایران کے درمیان کشیدگی میں اضافہ دیکھا جا رہا ہے۔ تاہم حالیہ فوجی جھڑپوں اور جانی نقصانات سے متعلق مختلف دعوے سامنے آ رہے ہیں، جن کی آزاد ذرائع سے مکمل تصدیق نہیں ہو سکی ہے۔