امریکا نے سعودی عرب کو 5 ارب ڈالر مالیت کے بم فروخت کرنے کی منظوری دے دی

واشنگٹن: امریکا نے سعودی عرب کو تقریباً 5 ارب ڈالر مالیت کے بم فروخت کرنے کی منظوری دے دی ہے۔

امریکی محکمہ خارجہ کے مطابق سعودی عرب کو جوائنٹ ڈائریکٹ اٹیک میونیشنز ایکسٹینڈڈ رینج (JDAM-ER) کی ممکنہ فروخت کی منظوری دی گئی ہے، جس کا بنیادی ٹھیکہ امریکی دفاعی کمپنی بوئنگ کو ملے گا۔

امریکی حکام کے مطابق سعودی عرب کو تقریباً 750 ملین ڈالر مالیت کے AGT-150 انجنز کی علیحدہ فروخت کی بھی منظوری دی گئی ہے، جس کا ٹھیکہ ہنی ویل کو ملنے کا امکان ہے۔ یہ انجن جنگی ٹینکوں میں استعمال ہوتے ہیں۔

امریکی محکمہ خارجہ کا کہنا ہے کہ مجوزہ دفاعی معاہدوں سے سعودی عرب کی موجودہ اور مستقبل کے خطرات سے نمٹنے کی صلاحیت بہتر ہوگی، جبکہ دفاعی تیاری، آپریشنل ضروریات پوری کرنے کی صلاحیت اور امریکا سعودی دفاعی تعاون کو بھی تقویت ملے گی۔

عمان اور عراق کے لیے بھی دفاعی معاہدوں کی منظوری

دریں اثنا امریکا نے عمان اور عراق کے لیے بھی دو مزید دفاعی سودوں کی منظوری دے دی ہے۔

امریکی محکمہ خارجہ کے مطابق عمان کو F-16 لڑاکا طیاروں کی دیکھ بھال اور معاونت کی خدمات فراہم کرنے کے لیے 188 ملین ڈالر مالیت کے ممکنہ معاہدے کی منظوری دی گئی ہے۔

اسی طرح عراق کو تقریباً 150 ملین ڈالر مالیت کے Bell 412EPX ہیلی کاپٹرز فروخت کرنے کی بھی منظوری دی گئی ہے۔